ޕްރޮސިކިއުޓަރ ޖެނެރަލް ވ. މުޙައްމަދު ފިރުޝާން

ކްރިމިނަލް ކޯޓުން ނިންމީ، މުއްދަތު އިތުރުކުރުމަށް ތަޙްޤީޤުކުރާ ފަރާތުން ސަބަބު ބަޔާންކޮށް ހުށަހެޅިކަމާއި އިތުރުކުރި މުއްދަތުގައި ތަޙްޤީޤަށް ކަމެއް ކުރިކަން އެނގެން ނެތުމުން، ދަޢުވާކުރުމުގެ މުއްދަތު ފަހަނައަޅައިފިކަމުގެ ދިފާޢު ސާބިތުވާކަމަށް ކަނޑައަޅައި ދަޢުވާ ބާޠިލުކުރުމަށެވެ.

ކޮޓަރިއެއްގެ ސޭފެއްގެ ތެރެއިން ކެނެބިސް ފެނުމުން ދަޢުވާ ލިބުނު ފަރާތުގެ މައްޗަށް ކެނެބިސް ޓްރެފިކްކުރުމުގެ ދަޢުވާ އުފުލިއެވެ. ތަޙްޤީޤަށް ޕްރޮސިކިއުޓަރ ޖެނެރަލުން ދެ ފަހަރު 15 ދުވަހުން މުއްދަތު އިތުރުކޮށްދީ، 8 މާރިޗު 2018 ގައި ދަޢުވާ ހުށަހެޅިއެވެ.

ޕްރޮސިކިއުޓަރ ޖެނެރަލުން ބުނީ ދަށުކޯޓުގެ ނިންމުމަކީ ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 94 ވަނަ މާއްދާއާ ޚިލާފު ނިންމުމެއްކަމަށެވެ. އިސްތިއުނާފު ރައްދުވި ފަރާތުން އިޖްރާއީ ނުކުތާއެއްގެ ގޮތުން ބުނީ އިސްތިއުނާފު ހުށަހެޅީ 10 ދުވަހުގެ މުއްދަތު ހަމަވުމަށްފަހުކަމަށެވެ.

ކެނެބިސް ޓްރެފިކްކުރުމުގެ ދަޢުވާ ޖިނާއީ އިޖްރާއަތުގެ ޤާނޫނުގެ 94 ވަނަ މާއްދާގައިވާ ދަޢުވާކުރުމުގެ މުއްދަތު ފަހަނައަޅައި ހުށަހަޅާފައިވާކަމަށް ބުނެ ކްރިމިނަލް ކޯޓުން ދަޢުވާ ބާޠިލުކުރުމަކީ ޤާނޫނާ އެއްގޮތް ނިންމުމެއްތޯ، ޚާއްޞަކޮށް ޕްރޮސިކިއުޓަރ ޖެނެރަލް ތަޙްޤީޤު މުއްދަތު އިތުރުކުރި ސަބަބު ބަޔާންކޮށްފައިނުވުމުގެ އަސަރު؛ އަދި އިސްތިއުނާފު ހުށަހެޅީ މުއްދަތުގެ ތެރޭގައިތޯ.

އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް (އަޣްލަބިއްޔަތުން)

އިސްތިއުނާފު ހުށަހެޅީ މުއްދަތުގެ ތެރޭގައިކަމަށް ކަނޑައެޅިއެވެ. އަޣްލަބިއްޔަތުގެ ރައުޔުގައި، ދަށުކޯޓަށް ހުށަހެޅި މުއްދަތު އިތުރުކުރި ލިޔުމުގައި ހަމައެކަނި 'ތަޙްޤީޤު ފުރިހަމަކުރުމަށްޓަކައި' ލިޔެފައިވާތީ ސަބަބު ބަޔާންކުރުމުގެ ޝަރުޠު ފުރިހަމަނުވާކަމަށާއި، ސަބަބު ބަޔާންކޮށްފައިވާ ފޯމުތައް ހުށަހެޅީ އިސްތިއުނާފު މަރުޙަލާގައި ކަމަށްވާތީ ބުރަދަން ނުދެވޭނެކަމަށް ކަނޑައަޅައި ދަށުކޯޓުގެ ނިންމުން ޤާއިމުކުރިއެވެ. ޚިލާފު ރައުޔުގައި، ސަބަބު ބަޔާންކޮށް މުއްދަތު އިތުރުކުރުމަށް އެދި، ތަޙްޤީޤަށް ކަންތައްތައް ކޮށްފައިވާތީ ދަޢުވާ ހުށަހެޅީ މުއްދަތުގެ ތެރޭގައިކަމަށް ދެކުނެވެ.