ޕްރޮސިކިއުޓަރ ޖެނެރަލް ވ. މުޙައްމަދު އަކްރަމް

ތަޙްޤީޤު މުއްދަތު 94(ރ) އާ ޚިލާފަށް އިތުރުކޮށް ދަޢުވާކުރުމުގެ މުއްދަތުގައި ދަޢުވާ ނުކުރާކަން މަދަނީ މިންގަނޑުން ސާބިތުވާތީ، ދަޢުވާތައް މައުޟޫޢީ ގޮތުން ކުރިއަށް ނުގެންދެވޭނެކަމަށް ކްރިމިނަލް ކޯޓުން ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 120 ވަނަ މާއްދާގެ ދަށުން ނިންމިއެވެ.

މަސްތުވާތަކެތި ބޭނުންކުރުމާއި ޓްރެފިކްކުރުމުގެ ތުހުމަތުގައި 8 ޑިސެމްބަރު 2020 ގައި ހައްޔަރުކުރި މީހެއްގެ މައްޗަށް 14 ފެބުރުވަރީ 2021 ގައި ދަޢުވާކުރިއެވެ. ތަޙްޤީޤު މުއްދަތު އިތުރުކުރިކަން ދައްކާ ދަށުކޯޓަށް ހުށަހެޅި ފޯމުތަކުގައި ވަނީ މުއްދަތު ހަމަވުމަށްފަހުގެ ތާރީޚެވެ.

ދައުލަތުން ބުނީ 3 ޖަނަވަރީ 2021 ގައި ފުލުހުން އެދި 5 ޖަނަވަރީ 2021 ގައި މުއްދަތު އިތުރުކުރި ކަމަށާއި ދަޢުވާ ކުރީ މުއްދަތުގައި ކަމަށެވެ. ތުހުމަތުކުރެވޭ ފަރާތުން ބުނީ ފުލުހުން އެދުނު ލިޔުން ދަށުކޯޓަށް ހުށަހަޅާފައި ނުވާކަމަށާއި، ހުށަހެޅި ލިޔުންތައް ފަހުން ތައްޔާރުކުރި ލިޔުންތަކެއް ކަމަށެވެ.

ތަޙްޤީޤުގެ މުއްދަތު އިތުރުކުރެވިފައިވަނީ ޖިނާއީ އިޖުރާއަތުގެ ޤާނޫނުގެ 94 ވަނަ މާއްދާގެ (ރ) އާ އެއްގޮތަށްތޯ، އަދި ލިޔުންތަކުގެ ތާރީޚުތަކުގައިވާ އޮޅުންތަކުގެ ސަބަބުން ދަޢުވާކުރުމުގެ މުއްދަތު ފާއިތުވެފައިވާކަމަށް ބަލައި ދަޢުވާތައް މައުޟޫޢީ ގޮތުން ކުރިއަށް ނުގެންދެވޭނެކަމަށް ކްރިމިނަލް ކޯޓުން ނިންމީ ރަނގަޅަށްތޯ.

ދަށުކޯޓުގެ ނިންމުން ބާޠިލު، އަލުން ބެލުމަށް ފޮނުވި (އަޣުލަބިއްޔަތުން)

އަޣުލަބިއްޔަތު ރައުޔުގައި، ދަށުކޯޓަށް ހުށަހެޅި ފޯލިއޯ 766 ގެ ލިޔުމުން މުއްދަތު ހަމަވުމުގެ ކުރިން 15 ދުވަހަށް މުއްދަތު އިތުރުކުރިކަން އެނގޭތީ ތާރީޚުގެ އޮޅުންތަކަކީ ރަނގަޅުކުރެވިދާނެ އައިބުތަކެއްކަމަށް ކަނޑައެޅިއެވެ. ޚިލާފު ރައުޔުގައި، ފުލުހުން ސަބަބު ބަޔާންކޮށް އެދުނު ލިޔުން ނުހުށަހެޅުމުން ދައުލަތަށް ބުރަ އުފުލިފައިނުވާކަމަށް ކަނޑައެޅިއެވެ.