ޕްރޮސިކިއުޓަރ ޖެނެރަލް ވ. މައިސާން އިބްރާހީމް ފުޅު

ނައިފަރު މެޖިސްޓްރޭޓް ކޯޓުން، 12/2009 ގެ 47 ވަނަ މާއްދާގައިވާ 5 ބާވަތުގެ ހެކި ނެތުމާއި މެޑިކޯ ލީގަލް ރިޕޯޓުގެ ޞައްޙަކަމާމެދު ސުވާލު އުފެދޭތީ، ޖިނާއީ އިޖުރާއަތުގެ ޤާނޫނުގެ 115 (ހ) ގެ ދަށުން މަދަނީ މިންގަނޑުން ދަޢުވާއާއިގެން ކުރިއަށް ނުދެވޭނެކަމަށް ކަނޑައަޅައި ދަޢުވާ ބާޠިލްކުރި.

ތުހުމަތުކުރެވޭ ފަރާތުގެ މައްޗަށް ޤާނޫނު ނަންބަރު 12/2009 ގެ 3 ވަނަ މާއްދާގެ (ށ) ގެ ދަށުން ކުޑަކުއްޖަކާއެކު ޖިންސީ ޢަމަލެއް ހިންގުމުގެ ދަޢުވާ ދައުލަތުން އުފުލި. އިބްތިދާއީ އަޑުއެހުމުގައި ތުހުމަތުކުރެވޭ ފަރާތުން ދަޢުވާއަށް އިންކާރުކުރި.

ޕްރޮސިކިއުޓަރ ޖެނެރަލް ބުނީ އެ ނިންމުމަކީ ޤާނޫނުއަސާސީގެ 223 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 115 (ހ) އާ ޚިލާފު ނިންމުމެއް ކަމަށާއި، ހައިކޯޓުގެ A/06-S-HC/2018 އާއި A/07-N-HC/2018 ގެ އުޞޫލުތަކަށް ތަބާނުވެ ނިންމި ނިންމުމެއް ކަމަށެވެ.

ކުޑަކުއްޖަކާއެކު ޖިންސީ ޢަމަލެއް ހިންގުމުގެ ދަޢުވާއަށް ތުހުމަތުކުރެވޭ ފަރާތުން އިންކާރުކުރުމުން، ޖިނާއީ އިޖުރާއަތުގެ ޤާނޫނުގެ 115 ވަނަ މާއްދާގެ (ހ) ގެ ދަށުން މަދަނީ މިންގަނޑުން ބަލައި ދަޢުވާ ބާޠިލުކުރުމަކީ ޤާނޫނާ އެއްގޮތަށް ނިންމި ނިންމުމެއްތޯ؛ އަދި އެ ނިންމުމަކީ ހައިކޯޓުގެ ކުރީގެ ސާބިޤާތަކާ ޚިލާފު ނިންމުމެއްތޯ.

ދަށު ކޯޓުގެ ނިންމުން ބާޠިލު، މައުޟޫޢީގޮތުން ބަލައި ނިންމުމަށް ދަށު ކޯޓަށް ފޮނުވި

115 (ހ) ގެ ދަށުން ބަލަންވީ މަދަނީ މިންގަނޑުން prima facie މައްސަލައެއް އޮތްތޯ އެކަންޏެވެ. ދައުލަތުން ޝަފަހީ ހެކިންނާއި ރިޕޯޓުތަކާއި ވީޑިއޯ ރެކޯޑިންގ ހުށަހަޅާފައިވާތީ މައްސަލަ މައުޟޫޢީގޮތުން ބަލަންޖެހޭނެއެވެ. ހެކި ވަޒަންކުރުމަކީ މައުޟޫޢީ މަރުޙަލާގެ ކަމެކެވެ.