ޕްރޮސިކިއުޓަރ ޖެނެރަލް ވ. އިބްރާހީމް ފަޟީލް

ދަށުކޯޓުން، ސާމްޕަލް ނެގީ ޤަވާއިދު ނަންބަރު 2019/R-1052 ގެ 124 ވަނަ މާއްދާގައިވާ ގޮތަށް ނޫންކަމަށާއި ރުހުން ހޯދާފައި ނުވާކަމަށް ބުނެ ޑީ.އެން.އޭ ރިޕޯޓު ބަލައިނުގަނެ، ޖިނާއީ އިޖުރާއަތުގެ ޤާނޫނުގެ 115 (ހ) ގެ ދަށުން ދަޢުވާ ފޯމް ބާޠިލުކުރިއެވެ.

ތުހުމަތުކުރެވޭ ފަރާތުގެ މައްޗަށް ޒިނޭކުރުމުގެ ދަޢުވާ ލ. ގަމު މެޖިސްޓްރޭޓް ކޯޓުގައި އުފުލިއެވެ. ދައުލަތުން ހުށަހެޅި ހެކީގެ ތެރޭގައި އެހެން މައްސަލައެއްގެ ތަޙްޤީޤަށް ނެގި ސާމްޕަލަކުން ތައްޔާރުކުރި ޑީ.އެން.އޭ ރިޕޯޓެއް ހިމެނުނެވެ. ދިފާޢުން އެ ރިޕޯޓު ހެދިގޮތް ދެނެގަތުމަށް ހެކި ހާމަކުރުމަށް އެދި ޝަރީޢަތުގެ ކުރިން ހުށަހަޅާ ހުށަހެޅުމެއް ހުށަހެޅިއެވެ.

ދައުލަތުން ބުނީ ނިންމުމަކީ ފަނޑިޔާރުންގެ ޤާނޫނާއި ޤާނޫނުއަސާސީއާ ޚިލާފަށް ޤަވާއިދުގެ 124 ވަނަ މާއްދާ މާނަކޮށް ނިންމި ނިންމުމެއްކަމަށެވެ. ދިފާޢުން ބުނީ ސާމްޕަލް ނެގީ ޤަވާއިދާ އެއްގޮތަށް ނޫންކަމަށާއި ރުހުން ނުހޯދާތީ ހެކި ބަލައިނުގަނެވޭނެކަމަށާއި ތަޙްޤީޤު އެކަށީގެންވާ ނުވާކަމަށެވެ.

ޒިނޭކުރުމުގެ ދަޢުވާއެއްގައި ދިފާޢުން ހެކި ހާމަކުރުމަށް އެދި (ޖިނާއީ އިޖުރާއަތުގެ ޤާނޫނުގެ 119 (ހ) (6) ގެ ދަށުން) ހުށަހެޅި ޝަރީޢަތުގެ ކުރިން ހުށަހަޅާ ހުށަހެޅުމެއްގެ ތެރެއިން ދަށުކޯޓަށް ޑީ.އެން.އޭ ރިޕޯޓެއް ބަލައިނުގަނެ، ދަޢުވާ ބާޠިލުކުރެވޭނެތޯ.

ދަށުކޯޓުގެ ނިންމުން ބާޠިލު

ދިފާޢުން ހުށަހެޅީ 119 (ހ) (6) ގެ ދަށުން ހެކި ހާމަކުރުމަށް އެދޭ ހުށަހެޅުމެއް ކަމުން، 119 (ހ) (3) ގެ ދަށުން ހެކި ބަލައިނުގަތުމަށް އެދޭ ހުށަހެޅުމެއް ނެތި ހެކި ބަލައިނުގަނެ ދަޢުވާ ބާޠިލުކުރުމަކީ ޤާނޫނުގެ އިޖުރާއަތާ ޚިލާފު ޢަމަލެކެވެ.