ޕްރޮސިކިއުޓަރ ޖެނެރަލް ވ. ޢަލީ ޖިބްރީލް

ކްރިމިނަލް ކޯޓުން 27 މާރޗް 2018 ގައި ތުހުމަތުކުރެވޭ ފަރާތް ޝަރުޠުކޮށް ބަންދުން ދޫކޮށްލުމަށް އަމުރުކުރިއެވެ.

ތުހުމަތުކުރެވޭ ފަރާތާއި އިތުރު މީހަކު ބައިވެރިވެގެން ޕޯސްޓް މެދުވެރިކޮށް މަސްތުވާތަކެތި އެތެރެކުރިކަމުގެ ތުހުމަތުގައި ހައްޔަރުކުރެވުނެވެ. ބަންދުގެ މުއްދަތު އިތުރުކުރަން ފުލުހުން އެދުމުން، އިތުރަށް ބަންދުކުރަންޖެހޭ ސަބަބެއް ނެތްކަމަށް ބުނެ ކްރިމިނަލް ކޯޓުން ޝަރުޠުކޮށް ދޫކޮށްލިއެވެ.

އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖްރާއަތުގެ ޤާނޫނުގެ 22 (ޅ)، 59 އަދި 60 ވަނަ މާއްދާއާ ޚިލާފު އަމުރެއްކަމަށާއި، ކުށަކީ މުޖުތަމަޢަށް ނުރައްކާތެރި ކުށެއްކަމުން 60 (ށ) (1) އާއި (4) ގެ ދަށުން ޝަރީޢަތް ނިމެންދެން ބަންދުގައި ބަހައްޓަންޖެހޭނެކަމަށާއި، މަތީ ކޯޓުތަކުގެ ނިންމުންތަކަށް ތަބާނުވާކަމަށް ދައުލަތުން ބުންޏެވެ.

ޕޯސްޓް މެދުވެރިކޮށް މަސްތުވާތަކެތި އެތެރެކުރިކަމުގެ ތުހުމަތުގައި ހައްޔަރުކުރެވިފައިވާ ފަރާތެއް ޝަރުޠުކޮށް ބަންދުން ދޫކޮށްލުމަށް ކްރިމިނަލް ކޯޓުން ނެރުނު އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖްރާއަތުގެ ޤާނޫނާ ޚިލާފު އަމުރެއްތޯ؛ ޝަރީޢަތް ނިމެންދެން ބަންދުގައި ބަހައްޓަންޖެހޭތޯ.

ކްރިމިނަލް ކޯޓުގެ ބަންދުން ދޫކޮށްލި އަމުރު ޤާއިމް، އިސްތިއުނާފު ބަލައިނުގަނެވި

ތަޙްޤީޤު ނިމި މައްސަލަ ޝަރީޢަތަށް ހުށަހަޅާފައިވީނަމަވެސް، ޕާރުސަލްގައި ހުރި މާއްދާއަކީ ކޮންއެއްޗެއްކަން އަދި ދެނެގަނެވިފައިނުވާކަމަށް ފުލުހުން ބުނެފައިވާތީ، ދޫކޮށްލި އަމުރަށް ބަދަލު ގެންނަން ޖެހޭ ސަބަބެއް ނުފެނުނެވެ.