ޕްރޮސިކިއުޓަރ ޖެނެރަލް ވ. އަޙްމަދު ޝިރާޒް

ފޭދޫ މެޖިސްޓްރޭޓް ކޯޓުން، ހުށަހެޅި ހެކިން ކުށުގެ ޢަމަލުގެ ރުކުން ސާބިތުނުވާނެކަމަށް ބަލައި، ޖިނާއީ އިޖުރާއަތުގެ ޤާނޫނުގެ 115 (ހ) ގެ ދަށުން ދަޢުވާއައިގެން ކުރިއަށްދާނެ ތަނެއް ނެތްކަމަށް ކަނޑައަޅައި ދަޢުވާ ބާޠިލުކުރިއެވެ.

ވައިބަރ ގްރޫޕެއްގައި ޑޮލަރު ވިއްކާކަމަށް އިޝްތިހާރުކުރުމުން ފަރާތަކުން އެހެން މީހެއްގެ އެކައުންޓަށް 26,250 ރުފިޔާ ޓްރާންސްފަރ ކުރުމަށްފަހު، އެ ފައިސާގެ ތެރެއިން 25,000 ރުފިޔާ ތުހުމަތުކުރެވޭ ފަރާތް އޭޓީއެމުން ނަގައި ހަވާލުވިކަމަށް ބުނެ، ހުއްދަނޫން ގޮތެއްގައި މުދަލުގެ މައްޗަށް ބާރުހިންގުމުގެ ދަޢުވާ އުފުލިއެވެ.

ދައުލަތުން ބުނީ މަދަނީ މިންގަނޑަށް ބަލާފައި ނުވާކަމަށާއި ސުޕްރީމް ކޯޓުގެ [2022] SC 30 އާ ޚިލާފުކަމަށާއި، ނިންމުން ނިންމާފައިވަނީ ޝަރީޢަތުގެ މަރުޙަލާގެ ސިފައިގައި ކަމަށެވެ. ރައްދުވާ ފަރާތުން ބުނީ ތުހުމަތު އުފެދޭ މިންވަރަށްވެސް ހެކި ނެތްކަމަށާއި ނިންމުން ޤާނޫނާ އެއްގޮތްކަމަށެވެ.

ޖިނާއީ އިޖުރާއަތުގެ ޤާނޫނުގެ 115 ވަނަ މާއްދާގެ (ހ) ގެ ދަށުން މަދަނީ މިންގަނޑުން ބަލާއިރު ދަޢުވާއައިގެން ކުރިއަށްދާނެ ތަނެއް ނެތްކަމަށް ކަނޑައަޅައި ދަޢުވާ ބާޠިލުކުރި މެޖިސްޓްރޭޓް ކޯޓުގެ ނިންމުމަކީ އެ މާއްދާއާއި ޤާނޫނުއަސާސީގެ 143 ވަނަ މާއްދާގެ (ރ) އާ ޚިލާފު ނިންމުމެއްތޯ؛ އަދި އެ މަރުޙަލާގައި ފަނޑިޔާރު ބަލަންޖެހޭ މިންގަނޑަކީ ކޮބައިތޯ.

ދަށުކޯޓުގެ ނިންމުން ބާޠިލު، ދަޢުވާ ކުރިއަށް ގެންދެވޭނެ ދަޢުވާއެއްކަމަށް ކަނޑައެޅި

ހެކި މަތިމަތިން ބަލާއިރު ކުށުގެ އުންސުރުތައް ފުރިހަމަވެދާނެ ހެކި ހުށަހަޅާފައިވާތީއާއި ފައިސާ ނެގުމުގައި ތުހުމަތުކުރެވޭ ފަރާތުގެ ދައުރެއް އޮތްކަން އެނގޭތީ، ދަޢުވާގައިވާ ކަންތައް ވުމުގެ އިޙްތިމާލު ބޮޑުކަމަށް ހައިކޯޓަށް ފެނުނެވެ؛ ހެކީގެ ބުރަދަން ވަޒަންކުރުމަކީ ޝަރީޢަތުގެ މަރުޙަލާގެ ކަމެކެވެ.