ޕްރޮސިކިއުޓަރ ޖެނެރަލް ވ. އަޙްމަދު ސަމާޙް

އައްޑޫ ފޭދޫ މެޖިސްޓްރޭޓް ކޯޓުން، ޖިނާއީ އިޖުރާއަތުގެ ޤާނޫނުގެ 45 ވަނަ މާއްދާގައިވާގޮތަށް ޢަމަލުކުރިކަމުގެ ލިޔުން ހުށަނާޅާތީއާއި ލިޔުން ހުށަހެޅުމަށް ފުރުޞަތު ދިނުން އެކަށީގެންވާ ކަމެއް ނޫންތީ، ހައްޔަރު ޤާނޫނާ އެއްގޮތްކަން ކަނޑައެޅެން ނެތުމުން ޝަރުޠެއްނެތި ދޫކޮށްލިއެވެ.

ތޫނު ހަތިޔާރު ބޭނުންކޮށްގެން ބިރުދައްކައި މާރާމާރީ ހިންގަން މަސައްކަތްކުރިކަމުގެ ތުހުމަތުގައި ހައްޔަރުކުރި ފަރާތުގެ ބަންދަށް 15 ދުވަސް އިތުރުކުރުމަށް ފުލުހުން އެދުނެވެ.

ޕީ.ޖީ. އިން ބުނީ ފޯމު ނުހުށަހެޅުމަކީ ރަނގަޅުކުރެވޭނެ އިޖުރާއީ ޢައިބެއް ކަމަށާއި ޢަލީ ޒުބައިރުގެ ޤަޟިއްޔާ ފަދައިން ފުރުޞަތު ދޭންޖެހޭ ކަމަށެވެ. ތުހުމަތުކުރެވޭ ފަރާތުން ބުނީ ކޮންމެ ފަހަރަކު ފުރުޞަތު ދިނުމުން އިޖުރާއަތުގެ ބޭނުން ކެނޑޭނެ ކަމަށާއި ހުށަނާޅާ ލިޔުމަކަށް ބުރަދަން ނުދެވޭނެ ކަމަށެވެ.

ހައްޔަރާމެދު ގޮތެއް ނިންމިކަމުގެ ފޯމު ބަންދުގެ މަޖިލީހަށް ހުށަހަޅާފައި ނުވާ ޙާލަތުގައި، އެ ލިޔުން ހުށަހެޅުމަށް ދައުލަތަށް ފުރުޞަތު ނުދީ ހައްޔަރުކުރުމުގެ ޤާނޫނީ ސައްޙަކަން ކަށަވަރުނުވާކަމަށް ބުނެ ތުހުމަތުކުރެވޭ ފަރާތް ޝަރުޠެއްނެތި ދޫކޮށްލުން ރަނގަޅުތޯ.

ދަށުކޯޓުގެ އަމުރު ބާޠިލު؛ ބަންދާމެދު ހައިކޯޓުން ގޮތެއް ނުނިންމައި، ދައުލަތުން އަލުން އެދިއްޖެނަމަ މި ޙުކުމުގެ ކަންކަމަށް ރިޢާޔަތްކުރަން ނިންމި

ފުރުޞަތު ދިނުމުން ތުހުމަތުކުރެވޭ ފަރާތުގެ ޙައްޤަށް އުނިކަމެއް ނާންނާނެ ކަމަށާއި، ތުހުމަތުގެ ސީރިއަސްކަމާއި ކުރީގެ ރެކޯޑަށް ބަލައި ފުރުޞަތު ދިނުން އެންމެ އެދެވޭ ގޮތް ކަމަށް ބަލައި ދަށުކޯޓުގެ އަމުރު ބާޠިލުކުރިއެވެ.