ޕްރޮސިކިއުޓަރ ޖެނެރަލް ވ. އާދަމް ޝަރީފް

އިތުރަށް ބަންދުގައި ބަހައްޓަންޖެހޭ ސަބަބެއް ހުށަހަޅާފައި ނުވާތީ ބަންދުން ދޫކޮށްލުމަށް ކްރިމިނަލް ކޯޓުން އަމުރުކުރިއެވެ.

އޮފީހެއްގެ ދޮރު ހަލާކުކޮށް 100,000 ރުފިޔާއަށްވުރެ ގިނަ ފައިސާ ވަގަށް ނެގި މައްސަލައެއްގައި ފިންގަރޕްރިންޓް ދިމާވި ކަމަށް ބުނެ ހައްޔަރުކުރި ފަރާތުގެ ބަންދު 15 ދުވަހަށް އިތުރުކުރުމަށް ފުލުހުން އެދުނެވެ. ދަޢުވާ ކުރެވިފައިވަނީ ހުއްދަނޫން ތަނަކަށް ވަނުމުގެ ކުށުގައެވެ.

ޕްރޮސިކިއުޓަރ ޖެނެރަލުން ބުނީ ވައްކަމުގެ ގިނަ ރެކޯޑު އޮތުމާއި އެހެން މައްސަލައެއްގައި ވެސް ބަންދުގައި ހުރުމުން ދޫކޮށްލައިފިނަމަ އަލުން ކުށް ކުރުމުގެ ފުރުޞަތު އޮންނާނެ ކަމަށެވެ. ތުހުމަތުކުރެވޭ ފަރާތުން ބުނީ މަޢާފު ލިބުމަށްފަހު ރަށުގައި މަސައްކަތްކުރަމުން އުޅުނު ކަމަށެވެ.

ވައްކަމުގެ ތުހުމަތުގައި ހައްޔަރުކުރި ފަރާތް ބަންދުން ދޫކޮށްލި ކްރިމިނަލް ކޯޓުގެ އަމުރު ޞައްޙަތޯ؛ ދަޢުވާ ކުރެވިފައިވަނީ ޖިނާއީ ކުދި ކުށެއްގައި ކަމުގައިވާއިރު ހަމައެކަނި ކުށުގެ ރެކޯޑު އޮތުމަކީ މުޖްތަމަޢުގެ ސަލާމަތަށް ނުރައްކާތެރިކަމުގެ ސަބަބުން ބަންދުގައި ބެހެއްޓޭނެ ސަބަބެއްތޯ.

އިސްތިއުނާފު ބާޠިލް، ކްރިމިނަލް ކޯޓުގެ އަމުރު ޤާއިމް

ދަޢުވާ ކުރެވިފައިވަނީ ޖިނާއީ ކުދި ކުށެއްގައި ކަމުން ވައްކަމުގެ ތުހުމަތު ވުޖޫދުގައި ނެތުމުން، ހަމައެކަނި ކުށުގެ ރެކޯޑަށް ބަލައި ބަންދުގައި ބެހެއްޓޭނެ ސަބަބެއް ނެތީތީ އަމުރަށް ބަދަލު ގެންނަންޖެހޭ ޤާނޫނީ ސަބަބެއް ނެތް ކަމަށް ފެނުނެވެ.