ނަން ސިއްރުކުރެވިފައި ވ. އަޙްމަދު ޝިހާމް

މެޖިސްޓްރޭޓް ކޯޓުން ކުއްޖާއަކީ ހެޔޮ ގޮތް ނިންމޭވަރުގެ ކުއްޖަކަށްވާތީ ކުއްޖާ މަންމަ ގާތަށް ދިއުން ކުއްޖާގެ އިޚްތިޔާރަށް ދޫކޮށް، ކުއްޖާ ރުހުމުގައި މަންމަ ގާތަށް އަންނަނަމަ ހުރަސް ނާޅަން އެންގުމާއި ފުލުހުންނަށް އެކަމަށް މާޙައުލު ޤާއިމުކުރުމަށް އަމުރުކުރިއެވެ.

މަންމަ އިތުރު ދަރިއަކު ވިހެއުމާ ގުޅިގެން ކުއްޖާގެ ޢުމުރުން އެއް އަހަރުގައި ކުއްޖާ ޙަވާލުކުރީ ކުއްޖާއާ ޝަރުޢީ ނުވަތަ ޢާއިލީ ގުޅުމެއް ނެތް ފަރާތަކާއެވެ. އެ ފަރާތް ކުއްޖާ ގެންގޮސް އެހެން ރަށެއްގައި ބަލަމުން ދިޔައިރު ކުއްޖާ ހޯދައިދިނުމަށް މަންމަ ނައިފަރު މެޖިސްޓްރޭޓް ކޯޓަށް ދަޢުވާ ކުރިއެވެ.

މަންމަ ބުނީ ކުއްޖާއަކީ ޤާނޫނީ ގޮތުން ކުޑަކުއްޖެއް ކަމަށާއި، ކުއްޖާ ހުރި މާޙައުލަކީ ޝަރުޢީ ނުވަތަ ޤާނޫނީ ގޮތުން ނިސްބަތްވާ މާޙައުލެއް ނޫން ކަމަށާއި، މިއީ ޙަޟާނަތުގެ މައްސަލައެއް ނޫންކަމުން ޙަޟާނަތުގެ މާއްދާއަށް ބަލައިގެން ނިންމުމަކީ ގޯހެއް ކަމަށެވެ.

ކުއްޖާއާ ނަސަބުގެ ގޮތުން ނުވަތަ ޤާނޫނީ ގޮތުން އެއްވެސް ގުޅުމެއް ނެތް ފަރާތެއްގެ ބެލުމުގެ ދަށުގައި ހުރި 18 އަހަރު ނުވާ ކުއްޖާ ހޯދައިދިނުމަށް މަންމަ ކުރި ދަޢުވާގައި، ކުއްޖާ ހުންނާނެ ތަން ކުއްޖާގެ އިޚްތިޔާރަށް ދޫކޮށް ދަށުކޯޓުން ނިންމި ނިންމުން ޤާނޫނާއި ކުއްޖާގެ މަޞްލަޙަތާ އެއްގޮތްތޯ.

ދަށުކޯޓުގެ ޙުކުމުގެ ބައެއް ބާޠިލު؛ ކުއްޖާ މަންމައާ ޙަވާލުކުރުމަށް އިސްތިއުނާފު ރައްދުވި ފަރާތަށް އަންގައިފި

ކުއްޖާއަށް އިޚްތިޔާރު ލިބެނީ މައިންބަފައިންގެ ތެރެއިން ކަމަށާއި، ކުއްޖާ ބަލަމުންދާ ފަރާތަކީ ގުޅުމެއް ނެތް، ރަސްމީ ގޮތުން ޙަވާލު ނުކުރާ ފަރާތެއް ކަމަށްވާތީ އޭނާގެ ބެލުމުގައި ބެހެއްޓުމަކީ ޤާނޫނުގެ ހަމަތަކާ އެއްގޮތަށް ކުއްޖާގެ މަޞްލަޙަތަށް ރިޢާޔަތްކުރުމެއް ނޫނެވެ.