ނަން ސިއްރު ކުރެވިފައި ވ. ނަން ސިއްރުކުރެވިފައި

ތ. ވޭމަންޑޫ މެޖިސްޓްރޭޓް ކޯޓުން (6/N11C/2022) ދަޢުވާ ހުށަހެޅި ތާރީޚުން ފެށިގެން ކުއްޖާގެ ޚަރަދާއި ބެލުމުގެ ޚަރަދަށް މަހަކު 2,000 ރުފިޔާ ދިނުމަށާއި ޢާއިލާއާބެހޭ ގަވާއިދުގެ 66 ވަނަ މާއްދާގެ ޚަރަދު ދެމުން ގެންދިއުމަށް ބައްޕައަށް އަންގައި، މީގެކުރިން ޚަރަދު ހޯދަން ދަޢުވާކޮށްފައި ނުވާތީއާއި ބައްޕަ އެއްބަސްވެފައި ނުވާތީ އިތުރު ޚަރަދު ނަގައިނުދެއެވެ.

ވަރި ސާބިތުކުރި ޤަޟިއްޔާގައި (16/N11C/2021) ދަރިފުޅުގެ ޚަރަދު ކޯޓު މެދުވެރިކޮށް ބޭނުން ނުވާކަމަށް މަންމަ ބުނި ނަމަވެސް، ޢާއިލާއާބެހޭ ގަވާއިދުގެ 66 ވަނަ މާއްދާގެ ޚަރަދު ދިނުމަށް ބައްޕައަށް އެންގިއެވެ. ފަހުން މަތީ ތަޢުލީމަށް މާލެ ފޮނުވި ދަރިފުޅުގެ ޚަރަދާއި މަންމަ ހިނގި 13,120 ރުފިޔާގެ އިތުރު ޚަރަދު ހޯދަން ދަޢުވާކުރެވުނެވެ.

މަންމަ ބުނީ ވަރި ޤަޟިއްޔާގައި ޚަރަދު ލައްވާފައިވާތީ ކުރިން މަސައްކަތްކުރިކަމަށް ބަލަންޖެހޭ ކަމަށާއި، ޚަރަދު ދޭންޖެހޭނީ ބައްޕަ ރުހޭ ކަންކަމަށް އެކަނި ނޫންކަމަށާއި، ކިޔެވުމަށް ފޮނުވީ ބައްޕައަށް އެނގިގެން ކަމަށެވެ.

ވަރި ސާބިތުކުރި ޤަޟިއްޔާގައި ދަރިފުޅުގެ ޚަރަދާބެހޭ އެއްބަސްވުމެއް ކުރެވި ޚަރަދު ދިނުމަށް ބައްޕައަށް އަންގާފައިވާ ޙާލަތެއްގައި، ފަހުން ހުށަހަޅާ ޚަރަދުގެ ދަޢުވާއެއްގައި ޚަރަދު ލައްވަންޖެހޭނީ ކޮން ތާރީޚަކުން ފެށިގެންތޯއާއި، ދަރިފުޅުގެ މަތީ ތަޢުލީމާ ގުޅޭ އިތުރު ޚަރަދުތައް (އަންނައުން، ލެޕްޓޮޕް، ކުލި، ފޯނު) ބައްޕަގެ ކިބައިން ނަގައިދެވޭނެތޯ.

ބައެއް ބަދަލުކުރި (ޚަރަދު ފެށޭ ތާރީޚް ވަރި ސާބިތުކުރުމަށް ހުށަހެޅި ތާރީޚަށް އިޞްލާޙުކޮށް، އިތުރު ޚަރަދުގެ ގޮތުގައި 7,119 ރުފިޔާ ނަގައިދިނުމަށް)

ޤާނޫނުގެ އިޞްލާޙާ އެއްގޮތަށް ވަރި ސާބިތުކުރި ޤަޟިއްޔާގައި ޚަރަދާމެދު އެއްބަސްވުމަކަށް އައިސްފައިވާތީ ޚަރަދު ފެށޭނީ އެ ޤަޟިއްޔާ ހުށަހެޅި ދުވަހުން ކަމާއި، ޢާއިލާއާބެހޭ ގަވާއިދުގެ 66 ވަނަ މާއްދާގެ ޚަރަދު ވަރި ޙުކުމުގައި ލައްވާފައިވާތީ ބައްޕަގެ އެއްބަސްވުމަށް ނުބަލާ ނަގައިދެވޭނެކަމާއި، ބައްޕަގެ ތަނަވަސްކަމަށް ބަލާއިރު އަންނައުނާއި ލެޕްޓޮޕް ނަގައިދެވޭނެ ނަމަވެސް ކުލިއާއި ތަފްޞީލު ނެތް ފޯނު ޚަރަދު ނަގައިނުދެވޭނެކަމެވެ.