2016/HC-A/33

މެޖިސްޓްރޭޓް ކޯޓުން ކުށް ސާބިތުވާކަމަށް ކަނޑައަޅައި ތުހުމަތުކުރެވޭ ފަރާތް 10 އަހަރަށް ޖަލަށްލުމަށް ޙުކުމްކުރިއެވެ.

ކުޑަކުއްޖަކާއެކު ޖިންސީ ޢަމަލެއް ހިންގިކަމަށް ބުނެ، ޤާނޫނު ނަންބަރު 12/2009 ގެ 3 ވަނަ މާއްދާގެ (ނ) ގެ ދަށުން ދައުލަތުން ދަޢުވާ އުފުލި މައްސަލައެކެވެ. ތުހުމަތުކުރެވޭ ފަރާތް ދަޢުވާއަށް އިންކާރުކުރިއެވެ.

އިސްތިއުނާފުކުރި ފަރާތުން ބުނީ ހެކިންނާ ސުވާލުކުރުމާއި ދިފާޢީ ހެކި ހުށަހެޅުމުގެ ފުރުސަތު ނުދީ، ޤާނޫނުއަސާސީގެ 51 ވަނަ މާއްދާގެ (އ) ގެ މިންގަނޑަށް ހެކި ވަޒަންނުކޮށް މައްސަލަ ނިންމި ކަމަށާއި، ވަކީލަކު ހޯދުމުގެ ޙައްޤު ގެއްލުނު ކަމަށާއި، ކުއްޖާގެ ހެކިބަސް ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 48 ވަނަ މާއްދާއާ ޚިލާފަށް ނެގި ކަމަށެވެ.

ކުޑަކުއްޖަކާއެކު ޖިންސީ ޢަމަލެއް ހިންގުމުގެ ކުށުގެ މައްސަލައެއްގައި، ތުހުމަތުކުރެވޭ ފަރާތަށް ވަކީލަކު ހޯދުމުގެ ޙައްޤާއި، ދައުލަތުގެ ހެކިންނާ ސުވާލުކުރުމާއި ދިފާޢީ ހެކި ހުށަހެޅުމުގެ ޙައްޤު ދީފައިވޭތޯއާއި، ކުއްޖާގެ ހެކިބަސް ޤާނޫނު ނަންބަރު 12/2009 ގެ 48 ވަނަ މާއްދާއާ އެއްގޮތަށް ނަގާފައިވޭތޯ.

ދަށުކޯޓުގެ ޙުކުމް ބާޠިލު

ވަކީލަކު ހޯދުމަށް ފުރުޞަތު ދީފައިވާތީ އެ ޙައްޤު ގެއްލިފައި ނުވެއެވެ. ނަމަވެސް ދައުލަތުގެ ހެކިންގެ ހެކިބަސް ނެގި މަޖިލީސްތަކަށް ތުހުމަތުކުރެވޭ ފަރާތް ހާޒިރުނުކުރުމާއި، ދިފާޢީ ހެކި ހުށަހެޅުމުގެ ފުރުސަތު ދީފައިވާކަން ނޭނގުމާއި، ކުއްޖާގެ ބަޔާން ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 48 ވަނަ މާއްދާގައިވާ ގޮތަށް ނެގިކަން ނޭނގުމާއެކު، ޤާނޫނުއަސާސީގެ 51 ވަނަ މާއްދާގެ ޙައްޤުތައް ގެއްލިފައިވާތީ ޙުކުމް ބާޠިލުކުރިއެވެ.