މުޙައްމަދު ޝަމްޢޫން ނަޞީރު ވ. މޯލްޑިވްސް ޕޮލިސް ސަރވިސް

ވަކިކުރުމަކީ ޤާނޫނުއަސާސީގެ 43 ވަނަ މާއްދާއާ ޚިލާފު ނިންމުމެއް ނޫން ކަމަށް ކަނޑައަޅައި ސިވިލް ކޯޓުން ދަޢުވާ ބަލައިނުގަތެވެ.

ފުލުސް ސަރޖެންޓެއް އިތުރު ބަޔަކާއެކު ގެއަކަށް ވަދެ އަންހެނަކަށް އަނިޔާކޮށް ފުލުހުންނަށް އިންޒާރުދިންކަމުގެ ތުހުމަތުގައި ޑިސިޕްލިނަރީ ބޯޑުން ބަލައި 14 މާރިޗު 2011 ގައި ވަޒީފާއިން ވަކިކުރިއެވެ.

އިސްތިއުނާފުކުރި ފަރާތުން ބުނީ 2012/SC-C/35 ގެ އުޞޫލުތަކަށް ރިޢާޔަތް ނުކުރި ކަމަށާއި، ހެކިވެރިންގެ ތެރެއިން ދެމީހެއްގެ ބަސް ޝަރުޢީ ޤާނޫނީ އުޞޫލުތަކާ ޚިލާފަށް ބަލައިގަނެ، ފުލުހުންގެ ދެ ހެކިވެރިންގެ ބަހުން ބިރުދެއްކިކަން ސާފުނުވާ ކަމަށެވެ.

ޖިނާއީ ތުހުމަތަކާ ގުޅިގެން ޑިސިޕްލިނަރީ ބޯޑުގެ ނިންމުމަކުން ފުލުސް ސަރޖެންޓެއް ވަކިކުރުމުގައި ސުޕްރީމް ކޯޓުގެ 2012/SC-C/35 ގެ އުޞޫލުތައް ތަޠްބީޤުވޭތޯ، ވަކިކުރުމަށް ބިނާކުރި ހެކިބަސްތައް (ތުހުމަތު އުފެދިދާނެ ހެކިވެރިއެއްގެ އަދި ޣައިރު މުސްލިމެއްގެ) ޤަބޫލުކުރެވޭތޯ، އަދި ވަކިކުރުމުގައި މައުޟޫޢީ އަދި އިޖުރާއީ ޢަދުލުވެރިކަން ޤާއިމުކުރެވިފައިވޭތޯ.

ދަށުކޯޓުގެ ޙުކުމް ބާޠިލު؛ ވަޒީފާއަށް ރުޖޫޢަ ނުކޮށް 3 މަހުގެ މުސާރައާއި ޢިނާޔަތް ބަދަލުގެ ގޮތުގައި ދިނުމަށް އަމުރު

ސުޕްރީމް ކޯޓުގެ ޤަޟިއްޔާ މި މައްސަލައާ ތަފާތުކަމާއި، ހެކިބަސްތައް ޤަބޫލުކުރުން ޚިލާފު ނޫންކަމާއި، މަދަނީ މިންގަނޑުން ތުހުމަތު ސާބިތުވާތީ މައުޟޫޢީ ޢަދުލުވެރިކަން ޤާއިމުވާ ނަމަވެސް، ބޯޑުން ތުހުމަތު އަންގައި ދިފާޢުގެ ފުރުޞަތު ނުދިނުމުން އިޖުރާއީ ޢަދުލުވެރިކަން ޤާއިމުނުވާތީ ބަދަލު ކަނޑައެޅިއެވެ.