އަޙްމަދު ޔާސިރު ވ. ޕްރޮސިކިއުޓަރ ޖެނެރަލް

ހއ. މާބައިދޫ މެޖިސްޓްރޭޓް ކޯޓުން ދަޢުވާ ސާބިތުވާކަމަށް ކަނޑައަޅައި 1 އަހަރާއި 6 މަސް ދުވަހަށް ޖަލަށްލުމަށް ޙުކުމްކުރިއެވެ.

ތުހުމަތުކުރެވޭ ފަރާތް ރޭގަނޑު ގެއަކަށް ވަދެ ކަތިވަޅި ހިފައިގެން "މަރައޭލާނީ" ބުނެ މީހަކާ ދިމާއަށް ދުއްވައިގަނެ މަރުގެ އިންޒާރު ދިންކަމަށް ބުނެ ބިރުދެއްކުމުގެ ދަޢުވާ ކުރެވުނެވެ.

އިސްތިއުނާފުކުރި ފަރާތުން ބުނީ ދައުލަތުގެ ހެކިންގެ ހެކިބަހުގައި (ބުނި ޢިބާރާތާއި ޝަކުވާވެރިޔާ ހުރި ތަނާމެދު) ފުށުއެރުން ހުރި ކަމަށާއި ހެކިންނަކީ ޢާއިލާގެ މީހުން ކަމަށާއި، ޝަރީޢަތް ނިމުނުގޮތުގެ ރިޕޯޓުގައި ސަބަބުތައް ބަޔާންކޮށްފައިނުވާ ކަމަށާއި ކުށްކުރި ތަނުގައި ނެތްކަމުގެ ދިފާޢަށް ރިޢާޔަތްނުކުރާ ކަމަށެވެ.

ދައުލަތުގެ ހެކިންގެ ހެކިބަހުގައި ފުށުއެރުންތަކެއް ހުރުމާއި، އެ ހެކިންނަކީ ޢާއިލާގެ މީހުން ކަމުގައިވުމުން ބިރުދެއްކުމުގެ ކުށް ސާބިތުކުރުމަށް އެ ހެކިބަސް ބަލައިގަނެވޭނެތޯ؛ އަދި ޝަރީޢަތް ނިމުނުގޮތުގެ ރިޕޯޓުގައި ކުށް ސާބިތުވި ސަބަބުތައް ޖިނާއީ އިޖުރާއަތުގެ ޤާނޫނުގައިވާ ގޮތަށް ބަޔާންކޮށްފައިވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހެކިބަހުގެ ތަފާތުތަކަކީ މެޓީރިއަލް ތަފާތުތަކެއް ނޫންކަމަށާއި، ޢާއިލާގެ ހެކިންގެ ހެކިބަހަށް ހަރުދަނާ ޤަރީނާގެ ދަރަޖަ ދޭންޖެހޭ ކަމަށާއި، ދިފާޢު ހުށަހެޅުމުގެ ފުރުޞަތު ދީފައިވާކަމަށާއި ރިޕޯޓުގައި ސަބަބުތައް ބަޔާންކޮށްފައިވާތީ ދަށުކޯޓުގެ ނިންމުމަށް ބަދަލު ގެންނަންޖެހޭ ސަބަބެއް ނެތްކަމަށް ކަނޑައެޅިއެވެ.