މުޙައްމަދު މުނީރު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ކުށް ސާބިތުވާކަމަށް ކަނޑައަޅައި، ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 9 ވަނަ މާއްދާގެ (ށ) ގެ ދަށުން 15 އަހަރުގެ ޖަލު ޙުކުމެއް ކުރިއެވެ.

އިތުބާރުކުރެވޭ މަޤާމެއްގައި ހުރެ ކުޑަކުއްޖަކާމެދު އެކި ދުވަސްމަތިން ޖިންސީ ޢަމަލު ހިންގިކަމަށް ތުހުމަތުކުރެވޭ ފަރާތުގެ މައްޗަށް ޤާނޫނު ނަންބަރު 12/2009 ގެ 9 ވަނަ މާއްދާގެ ދަށުން ދަޢުވާކުރެވުނެވެ. ހަމަ އެ ކުއްޖާއާ ބެހޭ އެހެން ދަޢުވާއެއް (275/Cr-C/2015) ވެސް އެކުއެކީގައި ބަލައި އެއްދުވަހު ޙުކުމްކުރެވުނެވެ.

އިސްތިއުނާފުކުރި ފަރާތުން ބުނީ ކުރިން ޖިންސީ ޢަމަލު ހިންގި މީހެއްކަމަށް ކަނޑައެޅީ ޙަޤީޤަތާ ޚިލާފަށް ކަމަށާއި، ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 47 ވަނަ މާއްދާ ތަޠުބީޤުކުރީ ގޯސްކޮށް ކަމަށާއި، ޤާނޫނުއަސާސީގެ 51(އ) އާއި 2014/HC-DM/01 ޤަޟިއްޔާއާ ޚިލާފަށް ކުށް ސާބިތުކުރިކަމަށެވެ. ޕްރޮސިކިއުޝަނުން ބުނީ ދެ މައްސަލަ އެކުއެކީ ބަލައި އެއްދުވަހު ނިންމުމުން 47(މ) ގެ ދަށުން ހެކި ނެގުނު ކަމަށެވެ.

އިތުބާރުކުރެވޭ މަޤާމެއްގައި ހުރެ ކުޑަކުއްޖަކާމެދު ޖިންސީ ޢަމަލެއް ހިންގުމުގެ ކުށުގައި، ޤާނޫނު ނަންބަރު 12/2009 ގެ 47 ވަނަ މާއްދާގެ ދަށުން ހެކި ބަލައިގަތުމާއި (ޚާއްޞަކޮށް (މ) ގެ similar fact evidence އާއި (އ) ގެ ކުއްޖާގެ ބަޔާން)، ކުށް ސާބިތުކުރުމަށް ދަށުކޯޓުން ހެކި ވަޒަންކުރި ގޮތް ރަނގަޅުތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

47(މ) ގެ ދަށުން ހެކި ނެގުން ރަނގަޅެއް ނޫނެވެ. ނަމަވެސް 47(އ) ގެ ދަށުން ކުއްޖާގެ ބަޔާން ބަލައިގަތުމާއި (ހ) އާއި (ވ) ގެ ދަށުން ބަލައިގަތް ހެކި ރަނގަޅެވެ. 5 ހެކި ހަމަނުވިނަމަވެސް، ޢާންމު އުޞޫލުން ޑޮކްޓަރީ ހޯދުންތަކާއި ސޯޝަލް ސަރވިސް ވޯކަރގެ ބަހާއި ގުޅޭ ޤަރީނާއިން އެކަށީގެންވާ ޝައްކަކުން ބޭރުވާ މިންވަރަށް ކުށް ސާބިތުވެއެވެ.