މުޙައްމަދު އަޒްރަމް ވ. ޕްރޮސިކިއުޓަރ ޖެނެރަލް

ކަނޑުހުޅުދޫ މެޖިސްޓްރޭޓް ކޯޓުން ވިލިނގިލި މެޖިސްޓްރޭޓް ކޯޓުގެ އަމުރު ދެމެހެއްޓުމަށް ނިންމިއެވެ.

އިތުބާރު ކުރެވޭ މަޤާމެއްގައި ހުރެ ކުޑަކުއްޖަކާ މެދު ޖިންސީ ގޯނާ ކުރިކަމުގެ ތުހުމަތުގައި ހައްޔަރުކުރި ފަރާތް، ވިލިނގިލި މެޖިސްޓްރޭޓް ކޯޓުން ޝަރީޢަތް ނިމެންދެން ބަންދުކުރުމަށް 2021 އޭޕްރިލް 8 ގައި އަމުރުކުރިއެވެ. އެ އަމުރު މުރާޖަޢާކުރުމަށް ކަނޑުހުޅުދޫ މެޖިސްޓްރޭޓް ކޯޓަށް ހުށަހެޅިއެވެ.

އިސްތިއުނާފުކުރި ފަރާތުން ބުނީ އަމުރަކީ ޤާނޫނު ނަންބަރު 12/2009 ގެ 30، 31، 35 ވަނަ މާއްދާތަކާއި، 2021/SC-A/13 ގެ އުޞޫލުތަކާއި، ޤާނޫނުއަސާސީގެ 45 އަދި 143 ވަނަ މާއްދާއާ ޚިލާފު އަމުރެއްކަމަށެވެ.

ކުޑަކުދިންނަށް ޖިންސީ ގޯނާކުރުމުގެ ތުހުމަތުގައި ޝަރީޢަތް ނިމެންދެން ބަންދުކުރި އަމުރު މުރާޖަޢާކޮށް ކަނޑުހުޅުދޫ މެޖިސްޓްރޭޓް ކޯޓުން ނެރުނު އަމުރު، ޤާނޫނު ނަންބަރު 12/2009 ގެ 36 ވަނަ މާއްދާއާ އެއްގޮތަށް ނިންމާފައިވޭތޯއާއި، ހުށަހެޅުނު އިސްތިއުނާފީ ނުކުތާތަކަކީ އެ އަމުރާ ގުޅޭ ނުކުތާތަކެއްތޯ.

މުރާޖަޢާގެ އަމުރަށް ބަދަލު ގެންނަންޖެހޭކަމަށް އަޣުލަބިއްޔަތުން ނިންމި (އިސްތިއުނާފީ ނުކުތާތައް ބަލައިނުގަނެ)

ނުކުތާތައް ވަނީ އަސްލު ބަންދު އަމުރާ ގުޅުވައިގެންކަމުން އެ ނުކުތާތައް ބަލައިނުގަތެވެ. ނަމަވެސް މުރާޖަޢާގެ އަމުރުގައި ބަންދުކުރި ސަބަބުތައް ދެމިހުރިތޯ ބަލާފައި ނުވާތީ ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 36 ވަނަ މާއްދާއާ އެއްގޮތަށް ނުވާކަމަށް އަޣުލަބިއްޔަތު ދެކުނެވެ. ޚިލާފު ރައުޔުގައި ބުނީ އެ މާއްދާއަށް ބިނާކުރި ނުކުތާއެއް ނެތުމުން ބަދަލު ނުގެނެވޭނެކަމަށެވެ.