މުޙައްމަދު އަޙްސަން ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ބަންދު ދެމެހެއްޓުމާއެކު، ކަސްޓޯޑިއަލް ޖަލެއްގައި ބަހައްޓާފައިވާ ސަބަބާއި ރިމާންޑް ޖަލަށް ބަދަލުކުރެވޭނެ ތާރީޚު 10 ދުވަހުގެ ތެރޭގައި ލިޔުމުން ސާފުކޮށްދިނުމަށް ދައުލަތަށް އަންގައި، ބަލި ޙާލަތާބެހޭ ކަންކަން ޕީޖީ އޮފީހަށް ހިއްސާކުރުމަށް އެންގިއެވެ.

ކެނަބިސް ޓްރެފިކްކުރުމުގެ ދަޢުވާގައި ޝަރީޢަތް ނިމެންދެން ރިމާންޑް ޖަލެއްގައި ބަހައްޓަން ކްރިމިނަލް ކޯޓުން އަމުރުކުރި މީހަކު ކަސްޓޯޑިއަލް ޖަލެއްގައި ބަހައްޓާފައި ހުއްޓައި، ބަންދު މުރާޖަޢާކުރިއެވެ.

ތުހުމަތުކުރެވޭ ފަރާތުން ބުނީ ޖަލުތަކާއި ޕެރޯލްގެ ޤާނޫނާ ޚިލާފަށް ކަސްޓޯޑިއަލް ޖަލެއްގައި ބަހައްޓާފައިވާއިރު ދަށުކޯޓުން ފިޔަވަޅެއް ނާޅާކަމަށާއި، ބަންދުން ދޫކޮށްލަންޖެހޭކަމަށެވެ. ޕީޖީއިން ބުނީ ދަށުކޯޓުން ރިޢާޔަތްކުރަންޖެހޭ ހުރިހާ ކަމަކަށް ރިޢާޔަތްކޮށް ނިންމީކަމަށެވެ.

ރިމާންޑް ޖަލެއްގައި ބަހައްޓަން ކޯޓުން އަމުރުކޮށްފައިވާ ޝަރީޢަތް ނިމެންދެން ބަންދުގައި ހުރި މީހަކު ކަސްޓޯޑިއަލް ޖަލެއްގައި ބެހެއްޓުމަކީ އޭނާ ބަންދުން ދޫކޮށްލަންޖެހޭ ސަބަބެއްތޯ؛ އަދި ބަންދު މުރާޖަޢާގެ ނިންމުމާމެދު ހުށަހެޅި އިސްތިއުނާފީ ނުކުތާތައް ހައިކޯޓުން ގޮތެއް ކަނޑައަޅަންޖެހޭ މިންގަނޑު ފުރިހަމަވޭތޯ.

އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް

ދަށުކޯޓުން ކަސްޓޯޑިއަލް ޖަލުގައި ހުރުމަށް ރިޢާޔަތްކޮށް ފިޔަވަޅު އަޅާފައިވާތީއާއި، ތުހުމަތުކުރެވޭ ފަރާތް މިހާރު ރިމާންޑް ޖަލަށް ބަދަލުކޮށްފައިވާތީއާއި، ބަންދުގެ ސަބަބު ފިލައިނުދާތީއާއި، އެހެން ނުކުތާތަކުގައި ޚިލާފުވި ޤާނޫނެއް ނުވަތަ ޤާނޫނީ ބަހުސެއް ބަޔާންކޮށްނުދެވޭތީ ދަށުކޯޓުގެ ނިންމުމަށް ބަދަލެއް ނުގެނެވުނެވެ.