މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ ވ. ސިއްތި

އެހެން ފަރާތްތަކަށް ޙަވާލުކުރި އުޞޫލުން 8 މަސްދުވަހުގެ ތެރޭގައި ހައުސިންގ ޔުނިޓެއް ޙަވާލުކުރުމަށް މިނިސްޓްރީއަށާއި ދައުލަތަށް ސިވިލް ކޯޓުން ޙުކުމްކުރިއެވެ.

ދ.ވާނީ ރައްޔިތުން ދ.ކުޑަހުވަދޫއަށް ބަދަލުކުރުމުގައި ހައުސިންގ ޔުނިޓް ލިބޭ ފަރާތްތަކުގެ ލިސްޓަށް އިސްތިއުނާފު ރައްދުވާ ފަރާތުގެ ގޯތި އިތުރުކުރުމަށް ސިވިލް ކޯޓުގެ C/2016-Cv/357 ޤަޟިއްޔާއިން ޙުކުމްކުރުމުން ލިސްޓުގެ 52 ވަނައަށް ނަން ހިމެނުނެވެ. 53 ޔުނިޓުގެ ތެރެއިން 50 ފަރާތަކަށް ޔުނިޓް ދިނުމަށްފަހު އޭނާއަށް ޔުނިޓެއް ނުދިނެވެ.

ދައުލަތުން ބުނީ ހިޔާވަހިކަން ފޯރުކޮށްދިނުމަކީ ދައުލަތުގެ ކެރިފޯރުންތެރިކަމާ ގުޅިފައިވާ ކަމެއް ކަމަށް ޤާނޫނުއަސާސީގެ 23 ވަނަ މާއްދާއާއި A/273-HC/2012 ޤަޟިއްޔާގައި ކަނޑައަޅާފައިވާއިރު، 8 މަސްދުވަހުގެ ތެރޭގައި ޔުނިޓެއް ދިނުމަށް އެންގުމަކީ އޭގާ ޚިލާފު ކަމެއް ކަމަށެވެ.

ނިމުނު ޙުކުމަކުން ހައުސިންގ ޔުނިޓް ލިބޭ ފަރާތްތަކުގެ ލިސްޓަށް ނަން އިތުރުކުރެވުނު ފަރާތަކަށް ހައުސިންގ ޔުނިޓެއް ޙަވާލުކުރުމަށް ދައުލަތަށް އެންގުމަކީ، ހިޔާވަހިކަން ފޯރުކޮށްދިނުން ދައުލަތުގެ ކެރިފޯރުންތެރިކަމާ ގުޅިފައިވާ ކަމަށް ބުނާ ޤާނޫނުއަސާސީގެ 23 ވަނަ މާއްދާއާ ޚިލާފު ކަމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ލިސްޓަށް ނަން އިތުރުވީ ދައުލަތުން އިސްތިއުނާފުނުކުރާ ނިމުނު ޙުކުމަކުންކަމާއި، ލިސްޓުގެ އެހެން މީހުންނާ ތަފާތެއް ނެތްކަމާއި، ބާކީ 3 ޔުނިޓް ހުރިކަން ދައުލަތުން އިޢުތިރާފުވާތީ، ދައުލަތުގެ ނުކުތާއަކީ ބަލައިގަނެވޭ ނުކުތާއެއް ނޫން ކަމަށް ނިންމިއެވެ.