މެރީޑިއަމް ސަރވިސަސް ޕްރައިވެޓް ލިމިޓެޑް ވ. ސަޢީދާ މޫސާ

ސިވިލް ކޯޓުން، 20 ފެބްރުއަރީ 2014 އިން 01 ޖޫން 2014 އާ ހަމައަށް ދުވާލަކު 766.66 ރުފިޔާގެ މަގުން 76,666 ރުފިޔާ 3 މަހުގެ ތެރޭގައި ދެއްކުމަށް ޙުކުމްކުރެއްވިއެވެ.

ކުއްޔަށް ހިފި ގުދަން ހުސްކޮށް ތަޅުދަނޑި ޙަވާލުކުރުމާ ހަމައަށް ދުވާލަކު 766.66 ރުފިޔާ ދައްކަން C/2013-2255/Cv ގައި ކަނޑައެޅުނެވެ. އެ ޙުކުމް ތަންފީޛުކުރުމަށް ކުރި C/2014-565/Cv މައްސަލަ، 01 ޖޫން 2014 ގައި ތަޅުދަނޑި ޙަވާލުކުރިކަމަށް އެންގުމުން ނިމުނެވެ. އޭގެފަހުން ތަންފީޛީ ފައިސާ ހޯދުމަށް ކުއްޔަށްދިން ފަރާތުން ދަޢުވާކުރިއެވެ.

އިސްތިއުނާފުކުރި ކުންފުނިން ބުނީ، ތަޅުދަނޑި ޙަވާލުވުމަށް އަނެއް ފަރާތުން ތަކުރާރުކޮށް އިންކާރުކުރިކަން ސާބިތުކުރަން ހުށަހެޅި ހެކިން ނުގެނެސް، އަދި ތަޅުދަނޑިއާ ޙަވާލުނުވުމުން ޒިންމާއިން ބަރީޢަވާނެކަމުގެ ދަފްޢަށް ރިޢާޔަތްނުކޮށް ޙުކުމްކުރެއްވިކަމަށެވެ.

ކުރިން ކުރި ޙުކުމެއް ތަންފީޛުކުރުމުގެ މައްސަލައެއްގައި ކުލީގެ ބަދަލު ކަނޑައެޅިއިރު، ތަޅުދަނޑި ޙަވާލުވުމަށް ކުއްޔަށްދޭ ފަރާތުން އިންކާރުކުރިކަމަށް ބުނާ ނުކުތާއާއި ހެކި ބެލުމަށް ސިވިލް ކޯޓު ޖެހޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް (އިސްތިއުނާފު ރައްދުވާ ފަރާތުގެ ޣައިރު ޙާޟިރުގައި)

ތަޅުދަނޑި ޙަވާލުވުމަށް އިންކާރުކުރިކަމުގެ ނުކުތާ ތަންފީޛީ ކުރީގެ ޤަޟިއްޔާ (C/2014-565/Cv) ގައި ނަގައި ހެކި ހުށަހަޅާފައި ނުވާތީ، އަދި އެ ޤަޟިއްޔާ އިސްތިއުނާފުކޮށްފައި ނުވާތީ، އެ ނުކުތާ ފަހުގެ މައްސަލައެއްގައި ބެލުމަކީ އިންސާފުވެރި ގޮތެއް ނޫންކަމަށް ހައިކޯޓުން ދެކުނެވެ.