މަރްޔަމް ޢަލީ ވ. އަޙްމަދު ނަދީމް

ސިވިލް ކޯޓުން އެއްބަސްވުމާ ޚިލާފުވެ މަސައްކަތް ހުއްޓުވާފައިވާކަން ސާބިތުވާކަމަށް ކަނޑައަޅައި، ޝަރުޢީ އަގު ކޮމިޓީން ކަނޑައެޅި ރ. 696,388 ސީދާ ބަދަލުގެ ގޮތުގައްޔާއި، އޭގެ 15% (ރ. 104,458.20) ފެންނަ ގެއްލުމުގެ ބަދަލުގެ ގޮތުގައި، ޖުމްލަ ރ. 800,846.20 ނަގައިދިނުމަށް ޙުކުމްކުރިއެވެ.

އިސްތިއުނާފުކުރި ފަރާތަށް ހުޅުމާލެއިން ލިބިފައިވާ ބިމުގައި އިސްތިއުނާފު ރައްދުވާ ފަރާތުގެ ޚަރަދުގައި 4 ބުރީގެ ޢިމާރާތެއް ކޮށް، ވަކި ފްލޯތަކެއް ވަކި މުއްދަތަކަށް އޭނާއަށް ދިނުމަށް އަނގަބަހުން އެއްބަސްވެ، 2 ޝީޓް އެޅިފަހުން ދެބަސްވުން އުފެދި މަސައްކަތް ހުއްޓުވުމުން، ގެއްލުމުގެ ބަދަލު ހޯދުމަށް ދަޢުވާކުރި މައްސަލައެކެވެ.

އިސްތިއުނާފުކުރި ފަރާތުން ބުނީ ފަނޑިޔާރުންގެ ޤާނޫނުގެ 5 ވަނަ މާއްދާއާއި ކޮންޓްރެކްޓާބެހޭ ޤާނޫނަށް ރިޢާޔަތްކޮށްފައި ނުވާކަމަށާއި، ލިޔުމުން އެއްބަސްވުމެއް ނެތްކަމަށާއި، ޢާއިލީ ގުޅުމުގެ ސަބަބުން އިޢުތިރާޒުކުރަން ނުކެރުނުކަމަށާއި، ހެކިން ނުގެނެސް ނިންމާފައިވާކަމަށާއި، ބަދަލުގެ މިންވަރު ސާބިތުނުވާކަމަށާއި ޝަރުޢީ އަގު ކޮމިޓީގެ އުޞޫލު ރަނގަޅުނޫންކަމަށެވެ.

ލިޔުމުން ސޮއިކުރެވިފައިނުވާ ނަމަވެސް ބިމެއްގައި ޢިމާރާތް ކުރުމަށް ދެފަރާތުގެ ދެމެދު އަނގަބަހުން ކޮންޓްރެކްޓެއް ވުޖޫދުވެފައި ވޭތޯއާއި، އެކަމަށް ރުހުން ދީފައިވަނީ ނުރަނގަޅު ނުފޫޒެއްގެ ދަށުން ތޯއާއި، އެއްބަސްވުމާ ޚިލާފުވުމުން ލިބުނު ގެއްލުމުގެ ބަދަލުގެ ގޮތުގައި ޝަރުޢީ އަގު ކޮމިޓީގެ އަގާއި އޭގެ އިތުރަށް 15% ނުސީދާ ބަދަލު ނަގައިދިނުން ޞައްޙަ ތޯއެވެ.

ބައެއް ބަދަލުކުރި (15% ނުސީދާ ބަދަލު އުނިކޮށް، ޝަރުޢީ އަގު ކޮމިޓީގެ ރ. 696,388 ޤާއިމްކުރި)

ފައުންޑޭޝަން ހުއްދަ އިސްތިއުނާފުކުރި ފަރާތުގެ ނަމުގައި ހޯދުމާއި، 3 ޑްރާފްޓް އެކުލަވާލެވުމާއި، މަސައްކަތާމެދު ޝަކުވާ ހުށަހެޅުމުން އަނގަބަހުން ވެވުނު އެއްބަސްވުމެއް ސާބިތުވާކަމަށާއި، ނުރަނގަޅު ނުފޫޒެއް ސާބިތުނުވާކަމަށް ކޯޓުން ނިންމިއެވެ. ޝަރުޢީ އަގު ކޮމިޓީގެ އަގު ޤާއިމްކޮށް، އެއް ކުންފުންޏެއްގެ ފައިދާގެ މިންވަރަށް ބަލައި ކަނޑައެޅި 15% ބަދަލު ޢަދުލުވެރި ނޫންކަމަށް ބަލައި އުނިކުރިއެވެ.