މަރްޔަމް ޢާފިޔާ ވ. މުޙައްމަދު ޒާހިދު

ސިވިލް ކޯޓުން، ފައިސާ އަނބުރާ ނުދައްކާގޮތަށް ދީފައިވާކަން ސާބިތުވާ ހެއްކެއް ނެތުމާއި ވިއްކުމުގެ ޢަޤުދު ނުކުރެވޭތީ، ފައިސާ އަނބުރާ ދައްކަންޖެހޭކަން މަދަނީ މިންގަނޑުން ސާބިތުވާކަމަށް ކަނޑައަޅައި 4 މަސްދުވަހުގެ ތެރޭގައި ދެއްކުމަށް ޙުކުމްކުރިއެވެ.

އިސްތިއުނާފުކުރި ފަރާތުގެ ނަމުގައިވާ ގޯތި ވިއްކުމަށް 15 އޭޕްރީލް 2013 ގައި ލިޔުމުން އެއްބަސްވެ، ގޯތީގެ އަގުގެ ތެރޭގައި ނުހިމެނޭގޮތަށް އިދާރީ ކަންކަމަށް ދިނުމަށް އެއްބަސްވި 1,000,000 ރުފިޔާގެ ތެރެއިން 100,000 ރުފިޔާއާއި 54,216.86 ޑޮލަރު ގަންނަ ފަރާތުން ދެއްކިއެވެ. ގޯތި ވިއްކުމުގެ މުޢާމަލާތް ކުރިއަށް ނުދިޔައެވެ.

އިސްތިއުނާފުކުރި ފަރާތުން ބުނީ، ފައިސާ ދެއްކީ ބޭންކުގައި މޯގޭޖްކޮށްފައިވާ ގޯތި ސަލާމަތްކުރުމުގެ އިދާރީ މަސައްކަތަށް ކަމަށާއި، ވިއްކުން ނުވިޔަސް ފައިސާ އަނބުރާ ނުދޭގޮތަށް އަނގަބަހުން އެއްބަސްވެފައިވާކަމަށާއި، އެކަން ސާބިތުކުރުމަށް ހެކިން ހާޒިރުކުރުމުގެ ފުރުސަތު ނުދިންކަމަށާއި، ކޮންޓްރެކްޓާބެހޭ ޤާނޫނުގެ 19 (ހ) އާއި 20 (ހ) އާ ޚިލާފުކަމަށެވެ.

ގޯތި ވިއްކުމުގެ އެއްބަސްވުމަކާ ގުޅިގެން 'އިދާރީ ފީ' ގެ ގޮތުގައި ދައްކާފައިވާ ފައިސާ، ވިއްކުމުގެ މުޢާމަލާތް ފުރިހަމަނުވުމުން އަނބުރާ ދައްކަންޖެހޭތޯއާއި، އަނގަބަހުން ވެވުނު ކަމަށްބުނާ އެއްބަސްވުމެއް ސާބިތުކުރުމަށް ހެކިން ހާޒިރުކުރުމުގެ ފުރުސަތު ނުދީ ދަށުކޯޓުން މައްސަލަ ނިންމުމަކީ ޚިލާފެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ފައިސާ ދެއްކީ ގޯތި ގަތުމުގެ ބޭނުމުގައި ކަމާއި ގޯތި ވިއްކިފައިނުވާކަމާއި، ފައިސާއަކީ ތަބައްރުޢެއްކަން ސާބިތުކުރެވޭ ހުއްޖަތެއް ނެތުމާއި، ދަށުކޯޓަށް ހެކިން ހުށަހެޅިކަން ރެކޯޑުން ނޭނގޭތީ ދަށުކޯޓުގެ ޙުކުމް ޤާއިމްކުރިއެވެ.