މާލޭ ހައި ޕވޓ ލޓޑ ވ. މިނިސްޓްރީ އޮފް އެޑިއުކޭޝަން

ފަރުނީޗަރުގެ އަގު 451,189.00 ރުފިޔާ މިނިސްޓްރީން ދައްކަންޖެހޭކަން ސާބިތުވާކަމަށް ކަނޑައަޅައި، ޖޫރިމަނާގެ ގޮތުގައި އެދުނު ފައިސާ ނަގައިނުދެވޭނެކަމަށް ސިވިލް ކޯޓުން ޙުކުމްކުރިއެވެ.

ޢަރަބިއްޔާ ސްކޫލުގެ ދަރިވަރުން ވަގުތީގޮތުން މަންދު ކޮލެޖުގެ ޢިމާރާތަށް ބަދަލުކުރިއިރު، ކޮލެޖުގެ 519 ޑެސްކު، 148 ގޮނޑި އަދި 07 މޭޒު އަނބުރާ ޙަވާލުކުރާގޮތަށް މިނިސްޓްރީ އޮފް އެޑިއުކޭޝަންގެ ގުދަނަކަށް ގެންދިޔައިރު އެތަކެތި އަނބުރާ ރައްދުނުކުރުމުން، އިންވޮއިސްގައިވާ 451,189.00 ރުފިޔާއާއި ދުވާލަކަށް 0.5% ގެ ޖޫރިމަނާ ހޯދުމަށް ކޮލެޖުގެ މަސްއޫލު ކުންފުނިން ދަޢުވާކުރިއެވެ.

އިންވޮއިސްގައިވާ 3 ދުވަހުގެ މުއްދަތުގައި މިނިސްޓްރީން އިޢުތިރާޟް ނުކުރާތީ އިންވޮއިސް ޞައްޙަކަމުގައި ބެލެވޭނެ ކަމަށާއި، އަގުތައް ކުރިން އެއްބަސްވެފައިވާ ކަމަށާއި، ދިގު މުއްދަތެއް ވަންދެން ބަދަލު ހިފަހައްޓައިގެން ގެއްލުން ލިބިފައިވާ ކަމަށް ކުންފުނިން ބުނެފައިވެއެވެ.

ދައުލަތުގެ ބެލުމުގެ ދަށަށް އަނބުރާ ރައްދުކުރާގޮތަށް ގެންދިޔަ ފަރުނީޗަރުގެ އަގު ދައްކަން ޙުކުމްކުރިއިރު، އަމިއްލަ ފަރާތުން ފޮނުވި އިންވޮއިސްގައިވާ ދުވާލަކަށް 0.5% ގެ ޖޫރިމަނާ ފައިސާ ނަގައިނުދިނުމަކީ ޤާނޫނީ ކުށެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދެފަރާތުގެ މުޢާމަލާތަކީ ވިޔަފާރީގެ މުޢާމަލާތެއް ނޫން، މުދާ ރައްކާކޮށް ބެލެހެއްޓުމުގެ (އަމާނާތުގެ) މުޢާމަލާތެއް ކަމުން، މާލިއްޔަތު ގަވާއިދުގެ 12.14 ގައިވާ ގޮތަށް ޢަމަލުކުރަންޖެހޭނެ ކަމަށާއި، އިންވޮއިސްގައި އެއް ފަރާތުން ކަނޑައެޅި ޖޫރިމަނާ ދައުލަތުން ދައްކަންޖެހޭނެ ހަމައެއް ނެތްކަމަށް ހައިކޯޓުން ނިންމިއެވެ.