މޯލްޑިވިއަން ޑިމޮކްރެޓިކް ޕާޓީ ވ. އިލެކްޝަންސް ކޮމިޝަން

ސިޓީތަކަކީ ޤާނޫނުއަސާސީގެ 59(ހ) އާ ޚިލާފު ފިޔަވަޅެއްކަމަށް ބެލެވޭނެ ހަމައެއް ނެތްކަމަށާއި، ޤާނޫނު 19/2016 އިން ސިޓީތަކަށް ތައުކީދު ލިބޭތީ، ސިޓީތައް ބާޠިލުކުރާނެ ހަމައެއް ނެތްކަމަށް ސިވިލް ކޯޓުން ޙުކުމްކުރިއެވެ.

ސިޔާސީ ޕާޓީތަކުގެ ޤާނޫނުގެ 11 ވަނަ މާއްދާގެ ދަށުން، ފިންގަރޕްރިންޓް ނެތް މެންބަރުން ފިންގަރޕްރިންޓް ޖަހައި ފޯމް 31 ޑިސެމްބަރު 2015 ގެ ކުރިން ހުށަހަޅަންޖެހޭނެ ކަމަށާއި، އޭގެފަހުން މެންބަރުންގެ ގޮތުގައި ބަލާނީ އެގޮތަށް ފޯމު ހުށަހަޅާފައިވާ މީހުން އެކަނި ކަމަށް އިލެކްޝަންސް ކޮމިޝަނުން 2 ޕާޓީއަށް ސިޓީ ފޮނުވިއެވެ.

ޕާޓީތަކުން ބުނީ ސިވިލް ކޯޓުން ދަޢުވާގެ މައުޟޫޢަށް ރިޢާޔަތްނުކޮށް ނިންމި ކަމަށާއި، ޤާނޫނުގެ 11(ހ) ރެޓްރޮސްޕެކްޓިވްކޮށް މާނަކޮށް ކުރިން ތިބި މެންބަރުންނަށް އަލުން ފޯމް ހުށަހެޅުން ލާޒިމުކުރީ މާނަކުރުމުގެ އުޞޫލުތަކާ ޚިލާފަށް ކަމަށެވެ.

ސިޔާސީ ޕާޓީތަކުގެ ފިންގަރޕްރިންޓް ނެތް މެންބަރުން ފިންގަރޕްރިންޓް ޖަހައި ފޯމް ހުށަހަޅަންޖެހޭނެ ކަމަށް އިލެކްޝަންސް ކޮމިޝަނުން ފޮނުވި ސިޓީތަކަކީ ޤާނޫނުއަސާސީގެ 59 ވަނަ މާއްދާގެ (ހ) (ފަހުން ހަދާ ޤާނޫނަކުން އަދަބު ނުދިނުން) އާ ޚިލާފު ސިޓީތަކެއްތޯއާއި، ސިވިލް ކޯޓުން ދަޢުވާގެ މައުޟޫޢުގައި ޙުކުމް ކޮށްފައިވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަޢުވާގައި އެދިފައިވަނީ ސިޓީތަކަކީ 59(ހ) އާ ޚިލާފު ސިޓީތަކެއް ކަމަށް ކަނޑައެޅުމަށް ކަމާއި، 59(ހ) އަކީ ޖިނާއީ ކުށާއި އަދަބާ ގުޅޭ މާއްދާއެއްކަމުން އިދާރީ ސިޓީތަކަކީ އެ މާއްދާއާ ޚިލާފު ސިޓީތަކެއް ނޫންކަމަށާއި، ސިވިލް ކޯޓުން ޙުކުމްކުރީ ދަޢުވާގެ ސީޣާއާ އެއްގޮތަށް ކަމަށް ހައިކޯޓުން ކަނޑައެޅިއެވެ.