2016/HC-A/360

ސިވިލް ކޯޓުން ކަނޑައެޅީ ދެ ލިޔުމުން ތެދު މަޢުލޫމާތު ސާބިތުނުވާތީއާއި، ފޯމާއެކު ހުށަހެޅީ ގޭގެ ވެރިފަރާތުގެ ސޮއިނެތް އަމިއްލަ ލިޔުމެއް ކަމުން، ފްލެޓް ދިނުމަށް އަމުރުކުރާނެ ތަނެއް ނެތްކަމަށް.

ވެށިފަހި މާލެ ޕްރޮގްރާމުގެ "ސީ" ކެޓަގަރީން ފްލެޓަށް އެދުނު ފަރާތް ދާއިމީ ލިސްޓުގައި ހިމެނިފައިވަނިކޮށް، އޭނާ މާލޭގައި ދިރިއުޅުނު މުއްދަތާބެހޭ ދެ ލިޔުމުގައި ފުށުއަރާ މަޢުލޫމާތު ހުރުމުން އެ ބަޔަށް ޕޮއިންޓް ނުދީ ލިސްޓުން ނަން އުނިކުރި.

އިސްތިއުނާފުކުރި ފަރާތުން ބުނީ ދިރިއުޅުނު މުއްދަތު އެނގޭ ލިޔުން 20 ޖޫން 2012 ގައި ހުށަހެޅިކަން ދައުލަތުން ޤަބޫލުކުރާއިރު އެކަމަށް ރިޢާޔަތްނުކުރި ކަމަށާއި، ލިޔުންތަކުގެ ޞައްޙަކަމާމެދު ގޮތެއް ކަނޑައެޅުމަކީ ދަޢުވާގެ މައުޟޫޢުން ބޭރުން ނިންމި ނިންމުމެއް ކަމަށާއި، ލިޔުން ދޫކުރި ފަރާތުގެ ބަސް ނުހޯދި ކަމަށް.

ވެށިފަހި މާލެ ޕްރޮގްރާމުގެ "ސީ" ކެޓަގަރީގެ ފްލެޓަށް އެދުނު ފަރާތަށް، މާލޭގައި ރަޖިސްޓްރީނުވެ ދިރިއުޅުނު މުއްދަތަށް ޕޮއިންޓް ނުދިނުން ޞައްޙަތޯއާއި، ލިޔުންތަކުގެ ޞައްޙަކަމާމެދު ދަށުކޯޓުން ގޮތެއް ކަނޑައެޅުމަކީ ދަޢުވާގެ މައުޟޫޢުން ބޭރުން ނިންމި ނިންމުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އިސްތިއުނާފުކުރި ފަރާތް އަމިއްލައަށް ލިޔެ ހުށަހެޅި ލިޔުމާއި ފަހުން ހުށަހެޅި ސިޓީގައި ތަފާތު ބޮޑު ފުށުއެރުންތަކެއް ހުރުމުން ޕޮއިންޓް ނުދިނުމަކީ އުޞޫލާ ޚިލާފު ނިންމުމެއް ނޫން؛ ޕޮއިންޓް ނުދިން ސަބަބު ދައުލަތުން ފާހަގަކޮށްފައިވާތީ އޭގެ ޞައްޙަކަމާމެދު ނިންމުމަކީ ދަޢުވާގެ މައުޟޫޢުން ބޭރުން ނިންމި ނިންމުމެއް ނޫން.