މޯލްޑިވްސް އެއަރޕޯޓްސް ކޮމްޕެނީ ލިމިޓެޑް ވ. މުސްލިމް ޒުހުރީ

ޝަކުވާކުރި ފަރާތުގެ ބަޔާނަށް ބުރަދަންދޭ ހެއްކެއް ނެތީތީ މައުޟޫޢީ ޢަދުލުވެރިކަން، އަދި ކޮމިޓީގައި ޤާނޫނީ އަދަދަށްވުރެ ގިނަ މެންބަރުން ތިބުމާއި 60 ދުވަހަށްވުރެ ލަސްވުމުން އިޖުރާއީ ޢަދުލުވެރިކަން ޤާއިމުނުވާކަމަށް ކަނޑައަޅައި، ވަޒީފާ އިޢާދަކޮށް މުސާރައާއި އިނާޔަތް ދިނުމަށް ޓްރައިބިއުނަލުން ނިންމިއެވެ.

އެއާޕޯޓް ކުންފުނީގެ އެސިސްޓެންޓް މެނޭޖަރަކު އެހެން މުވައްޒަފަކަށް ޖިންސީ ފުރައްސާރަކުރިކަމަށް ކުންފުނީގެ ޖިންސީ ފުރައްސާރަ ހުއްޓުވުމުގެ ކޮމިޓީއަށް ޝަކުވާ ހުށަހެޅުމުން، ކޮމިޓީން ސާބިތުވާކަމަށް ނިންމައި އޭނާ ވަޒީފާއިން ވަކިކުރެވުނެވެ. ހާދިސާ ހިނގިކަމަށް ބުނަނީ ވަޒީފާގެ މާހައުލުން ބޭރުގައެވެ.

ކުންފުނިން ބުނީ ހެކިތަކަށް ރިޢާޔަތް ނުކުރި ކަމަށާއި މަދަނީ މިންގަނޑަށް ޢަމަލު ސާބިތުވާ ކަމަށާއި ކޮމިޓީ ޞައްޙަ ކަމަށާއި 60 ދުވަސް ފަހަނައެޅުމަކީ އިޖުރާއީ ޢަދުލުވެރިކަން ގެއްލޭ ކަމެއް ނޫން ކަމަށެވެ. މުވައްޒަފު ބުނީ ޝަކުވާކުރި ފަރާތުގެ ބަޔާން ދެކޮޅުޖެހޭ ކަމަށާއި ކޮމިޓީން ލީޑުކޮށް ސުވާލުކުރި ކަމަށެވެ.

ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ކޮމިޓީގެ ނިންމުމެއްގެ މައްޗަށް މުވައްޒަފު ވަޒީފާއިން ވަކިކުރުމުގައި މައުޟޫޢީ ޢަދުލުވެރިކަން ޤާއިމުނުވާކަމަށް ވަޒީފާއާބެހޭ ޓްރައިބިއުނަލުން ކަނޑައެޅީ ރަނގަޅަށްތޯއާއި، މަދަނީ މިންގަނޑުން ޖިންސީ ފުރައްސާރަ ސާބިތުވާކަމަށް ކޮމިޓީން ކަނޑައެޅީ ރަނގަޅަށްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ޝަކުވާކުރި ފަރާތުގެ ބަޔާނަށް ބުރަދަންދޭ ހެއްކެއް ނެތުމާއި، ބަޔާނުގެ ތެދުވެރިކަމާމެދު ސުވާލު އުފެދޭތީއާއި، ލީޑިންގ ސުވާލުތަކުން ހިނގިގޮތް ސާފުނުވާތީ މަދަނީ މިންގަނޑުން ސާބިތުވާކަމަށް ކޮމިޓީން ނިންމީ ރަނގަޅަށް ނޫނެވެ؛ އެހެންކަމުން ވަކިކުރުމުގެ އެކަށީގެންވާ ސަބަބެއް ނެތެވެ.