މުޙައްމަދު ރިޔާޟާ ވ. އިބްރާހީމް މުޙައްމަދު

ސިވިލް ކޯޓުން ޙުކުމް ތަންފީޛުކުރުމުގެ ގޮތުން 30 ދުވަހުގެ ތެރޭގައި ފަންގިފިލާ ހުސްކޮށް ޙަވާލުކުރުމަށް ފުލުހުންނަށް އަމުރުކުރިއެވެ.

ޢިމާރާތެއްގެ 6 ވަނަ ފަންގިފިލާ ކުއްޔަށްދިނުމުގެ އެއްބަސްވުމާ ޚިލާފުވެގެން ސިވިލް ކޯޓުން ކުރި ޙުކުމަކާ އެއްގޮތަށް، އެ ފަންގިފިލާ ހުސްކޮށް ކުއްޔަށް ހިފި ފަރާތްތަކާ ޙަވާލުކުރުމަށް ފުލުހުންގެ މައްޗަށް ސިވިލް ކޯޓުން އަމުރު ނެރުއްވިއެވެ. ބިމުގެ ވެރިފަރާތް ނިޔާވެފައިވާއިރު، ޕަވަރ އޮފް އެޓާރނީ ލިބިގެން އެއްބަސްވުމުގައި ސޮއިކުރި ފަރާތުން އެ އަމުރު އިސްތިއުނާފުކުރިއެވެ.

އިސްތިއުނާފުކުރި ފަރާތުން ބުނީ ވެރިފަރާތް ނިޔާވެ ވާރިޘުން ކަނޑައެޅުމުގެ ކުރިން، އަދި ފެމިލީ ކޯޓުގައި މައްސަލަ ހުރިއިރު އަމުރު ނެރުއްވުމާއި، 6 ވަނަ ފަންގިފިލާ ނުދެވިއްޖެނަމަ 4 ވަނަ ފަންގިފިލާ ދިނުމުގެ 9.2 ވަނަ މާއްދާއަށް ރިޢާޔަތްނުކުރުން ގޯސް ކަމަށެވެ.

ސިވިލް ކޯޓުން ކުރި ޙުކުމެއް ތަންފީޛުކުރުމަށް ތަނެއް ހުސްކޮށް ޙަވާލުކުރުމަށް ނެރުއްވި ކޯޓު އަމުރަކީ، ޙުކުމް ރައްދުވާ ފަރާތެއް ނިޔާވެ ވާރިޘުން ކަނޑައެޅުމުގެ މައްސަލައެއް ފެމިލީ ކޯޓުގައި ހުރުމާއި، އެއްބަސްވުމުގައި ބަދަލު ފަންގިފިލާއެއް ދިނުމުގެ މާއްދާއެއް އޮތުމާއެކު، ޝަރުޢީ އަދި ޤާނޫނީ ހަމަތަކާ ޚިލާފު އަމުރެއްތޯ.

އިސްތިއުނާފު ބާޠިލު، ދަށުކޯޓުގެ އަމުރު ޤާއިމް

ޙުކުމް އިސްތިއުނާފުކޮށް ބަދަލުވެފައިނުވާތީ ނިހާއީ ޙުކުމެއް ކަމާއި، ޙުކުމް ރައްދުވާ އެއްފަރާތެއް ނިޔާވުމާއި ފެމިލީ ކޯޓުގައި މައްސަލަ ހުރުމަކީ ތަންފީޛަށް ހުރަހެއް ނޫންކަމާއި، 4 ވަނަ ފަންގިފިލާވެސް މުއްދަތުގައި ދީފައިނުވާތީ ދޭން ޖެހޭނީ އަސްލު އެއްބަސްވި 6 ވަނަ ފަންގިފިލާކަމެވެ.