އިސްހާޤު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ޤާނޫނުއަސާސީ، ޓެރަރިޒަމް މަނާކުރުމުގެ ޤާނޫނު އަދި ޖިނާއީ އިޖުރާއަތުގެ ޤާނޫނުގެ ބަންދާބެހޭ މާއްދާތަކާ ޙަވާލާދީ، މުޖުތަމަޢުގެ ސަލާމަތަށްޓަކައި 10 ދުވަހަށް ބަންދުގެ މުއްދަތު އިތުރުކޮށް އަމުރުކުރިއެވެ.

ކުރީގެ ރައީސުލްޖުމްހޫރިއްޔާއާއި އިތުރު ބަޔަކަށް އައި.އީ.ޑީ ގޮއްވައިގެން ޒަޚަމްކުރި ހަމަލާއާ ގުޅިގެން ޓެރަރިޒަމްގެ ކުށްތަކުގެ ތުހުމަތުގައި އިސްތިއުނާފުކުރި ފަރާތް ހައްޔަރުކުރެވި، ހަތަރުވަނަ ފަހަރަށް ބަންދުގެ މުއްދަތު 10 ދުވަހަށް އިތުރުކުރެވުނެވެ.

އިސްތިއުނާފުކުރި ފަރާތުން ބުނީ ފުލުހުން އެދުނީ ބަންދާބެހޭ މާއްދާގެ (ކ) ގެ ދަށުން ކަމަށާއި، އެ އަކުރުގެ ދަށުން 15 ދުވަހަށްވުރެ ކުރު މުއްދަތެއް ނުޖެހޭނެ ކަމަށާއި، ދެވަނަ ފަހަރަށް އެ އަކުރު ތަޠުބީޤުނުކުރެވޭނެ ކަމަށެވެ. ދައުލަތުން ބުނީ އަމުރު ނެރުނީ ރަނގަޅަށް ކަމަށެވެ.

ޓެރަރިޒަމްގެ ކުށުގެ ތުހުމަތުގައި ބަންދުގައިވާ މީހެއްގެ ބަންދުގެ މުއްދަތު 10 ދުވަހަށް އިތުރުކޮށް ކްރިމިނަލް ކޯޓުން ނެރުނު އަމުރަކީ، ޖިނާއީ އިޖުރާއަތުގެ ޤާނޫނުގެ ބަންދާބެހޭ މާއްދާގެ (ކ) ގެ ދަށުން 15 ދުވަހަށްވުރެ ކުރު މުއްދަތަކަށް ބަންދުކުރެވޭތޯ، އަދި އަމުރުގައި އަކުރު ބަޔާންނުކުރުމުން އަމުރު ބާޠިލުވޭތޯ؛ ޚާއްޞަ ޤާނޫނުގެ ދަށުން ބަންދުކުރެވޭ މީހެއްގެ މައްޗަށް ޢާންމު އިޖުރާއަތުގެ ޤާނޫނު ތަޠުބީޤުކުރެވޭތޯ.

އިސްތިއުނާފު ބާޠިލް، ކްރިމިނަލް ކޯޓުގެ އަމުރު ޤާއިމް

ޚާއްޞަ ޤާނޫނުން ޢާންމު ޤާނޫނަށް ރުޖޫޢަވުން ހުއްދަކުރާތީ ޖިނާއީ އިޖުރާއަތުގެ ޤާނޫނު ތަޠުބީޤުކުރެވޭނެކަމާއި، ތުހުމަތުކުރެވޭ މިންވަރުގެ ހެކި ހުރުމާއެކު ޤާނޫނުއަސާސީގެ ސަބަބެއް އޮތްކަމަށް ދަށުކޯޓުން ބެލީ ރަނގަޅަށްކަމާއި، (ކ) ގެ ދަށުން ކުރު މުއްދަތަކަށްވެސް ބަންދުކުރެވޭނެކަމާއި، އަކުރު ބަޔާންނުކުރުމުން ބަންދު ޣައިރު ޤާނޫނީ ނުވާނެކަމެވެ. ތިންވަނަ ފަނޑިޔާރު ނަތީޖާއަށް ތާއީދުކުރެއްވީ ޓެރަރިޒަމް މަނާކުރުމުގެ ޤާނޫނުގެ ބާރުގެ މައްޗަށެވެ.