އިހްތިޝާމް ޢަލީ ވ. އާމިނަތު ސައުޝަން

ފެމިލީ ކޯޓުން އަމުރު އެއް ފަރާތަށް ރައްދުވާ ބައި ބާޠިލުކޮށް، އިސްތިއުނާފުކުރި ފަރާތަށް ރައްދުވާ ބައި ބާޠިލުނުކުރީ، އެ ފަރާތް އަމުރާ ޚިލާފުވިކަމަށްބުނެ ފުލުހުންނަށް ހުށަހެޅި މައްސަލަ ތަޙްޤީޤުކުރަމުންދާތީއެވެ.

ފެމިލީ ކޯޓުގެ 2595/Fm-C/2015 ޤަޟިއްޔާގެ ދަށުން ނެރުނު ގެވެށި އަނިޔާއިން ރައްކާތެރިކުރުމުގެ އަވަސް އަމުރު (B7/2015/17) ބާޠިލުކުރުމަށް އެދި، އެ އަމުރު ރައްދުވި ދެ ފަރާތުން 3 މަސް ހަމަވުމުގެ ކުރިން ފެމިލީ ކޯޓަށް މައްސަލަ ހުށަހެޅިއެވެ. އަމުރު ނެރުނުއިރު އޮތް ޙާލަތު ބަދަލުވެފައިވާކަމަށާއި، ފުލުހުންނަށް ހުށަހެޅި މައްސަލަ ފައިލްކޮށް ނިމިފައިވާކަމަށް އެ ފަރާތްތަކުން ބުނެއެވެ.

އިސްތިއުނާފުކުރި ފަރާތުން ބުނީ ދަށުކޯޓުގެ ނިންމުމަކީ 2014/HC-A/326 ޤަޟިއްޔާގައި ކަނޑައެޅި އުޞޫލާއި، ފަނޑިޔާރުންގެ ޤާނޫނުގެ 5 ވަނަ މާއްދާގެ (ށ) ގައިވާ، ހެއްކާއި ޤަރީނާއަށް ރިޢާޔަތްކުރުމުގެ އުޞޫލާ ޚިލާފު ނިންމުމެއް ކަމަށެވެ.

ގެވެށި އަނިޔާއިން ރައްކާތެރިކުރުމުގެ އަވަސް އަމުރު އިސްތިއުނާފުކުރި ފަރާތަށް ރައްދުވާ ބައި ބާޠިލުކުރަން ނުޖެހޭކަމަށް، އެ އަމުރާ ޚިލާފުވިކަމަށްބުނެ ފުލުހުންނަށް ހުށަހެޅި މައްސަލަ ތަޙްޤީޤުކުރަމުންދާތީ ފެމިލީ ކޯޓުން ކަނޑައެޅުން ޞައްޙަތޯ.

ދަށުކޯޓުގެ ޙުކުމުގެ އެބައި ބާޠިލު؛ އަވަސް އަމުރު އިސްތިއުނާފުކުރި ފަރާތަށް ރައްދުވާ ބައިވެސް ބާޠިލު

ފުލުހުންނަށް ހުށަހެޅި މައްސަލަ، ހުށަހެޅި ފަރާތުން ދޫކޮށްލަން އެދުމުން ފައިލްކޮށް ނިމިފައިވާކަން ފުލުހުންގެ ލިޔުމުން އެނގެން އޮތްއިރު، އަދި އެ ލިޔުން ދަށުކޯޓާ ޙިއްސާކޮށްފައިވާއިރު، އެކަމަށް ރިޢާޔަތްނުކޮށް ތަޙްޤީޤުކުރަމުންދާތީކަމަށް ބަލައި ކަނޑައެޅި އަސާސް ރަނގަޅެއް ނޫނެވެ.