އިބްރާހީމް ޞަބާޙް ވ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑް

ވަޒީފާއާބެހޭ ޓްރައިބިއުނަލުން، ވަޒީފާއާބެހޭ ޤާނޫނު ހުއްދަކުރާ އެކަށީގެންވާ ސަބަބަކާހުރެ ވަކިކުރީކަމަށް ކަނޑައަޅައި، މުވައްޒަފު އެދުނު އަމުރުތައް ނުކުރެވޭނެ ކަމަށް ނިންމިއެވެ.

މޯލްޑިވްސް އެއަރޕޯޓްސް ކޮމްޕެނީގެ މުވައްޒަފަކު، މަސައްކަތްކުރި ގަޑި އޮޅުވާލުމަށް އެހެން މީހެއްގެ އަތުން އައުޓްވާ ކާޑު ޖެއްސިކަމަށް ބަލައި ސުލޫކީ މައްސަލައެއްގެ ގޮތުގައި ވަޒީފާއިން ވަކިކުރިއެވެ.

މުވައްޒަފު ބުނީ ހައިކޯޓުގެ ނިންމުންތަކުގައިވާ މައުޟޫޢީ އަދި އިޖުރާއީ ޢަދުލުވެރިކަމުގެ އުޞޫލާ ޚިލާފަށާއި، ހެކިތަކުގެ ފުށުއެރުންތަކަށް ރިޢާޔަތްނުކޮށް ނިންމި ކަމަށެވެ. ކުންފުނިން ބުނީ ތަޙްޤީޤު ހިންގައި ފުރުޞަތު ދީގެން ވަކިކުރި ކަމަށާއި، ނުކުތާތައް ސުޕްރީމް ކޯޓުގެ ސްޓޭންޑަޑަށް ނުފޯރާ ކަމަށެވެ.

ވަޒީފާއިން ވަކިކުރުމާ ގުޅޭ ޓްރައިބިއުނަލުގެ ނިންމުމެއް، މަތީ ކޯޓުތަކުގެ ނިންމުންތަކާ (ޤާނޫނުއަސާސީގެ 143 (ރ)) އަދި ޢަދުލުވެރި ޝަރީޢަތުގެ އުޞޫލާ (ޤާނޫނުއަސާސީގެ 42 (ށ)) ޚިލާފުކަމަށް ބުނެ ހުށަހެޅި އިސްތިއުނާފީ ނުކުތާތަކަކީ ކޯޓުތަކުގެ ޤާނޫނުގެ 43 ވަނަ މާއްދާގެ މިންގަނޑަށް ފެތޭ ނުކުތާތަކެއްތޯ.

އިސްތިއުނާފީ ދަޢުވާ ފޯމް ބާޠިލު

ޓްރައިބިއުނަލުން ދެފަރާތުގެ ހެކިތަކަށް ރިޢާޔަތްކޮށް އުޞޫލުތައް ތަޠުބީޤުކޮށްފައިވާއިރު، ހުށަހެޅި ނުކުތާތަކަކީ ކޯޓުތަކުގެ ޤާނޫނުގެ 43 ވަނަ މާއްދާއަށް ފެތޭ ގޮތަށް ޤާނޫނީ ބަހުސެއް ސާފުކޮށް ބަޔާންކޮށްފައިވާ ނުކުތާތަކެއް ނޫންކަމުން އިސްތިއުނާފު ކުރިއަށް ނުގެންދެވޭނެ ކަމަށް ކޯޓު ނިންމިއެވެ.