ޙައްވާ ސަނާ ވ. ސިވިލް ސަރވިސް ކޮމިޝަން

ވަޒީފާއާބެހޭ ޓްރައިބިއުނަލުން ބުނީ ޝަކުވާ ހުށަހަޅާނެ ޙައްޤު ލިބިގެންވާތީ ގެއްލުމަކީ އިޢާދަނުކުރެވޭނެ ގެއްލުމެއް ނޫންކަމަށާއި، ދެފަރާތުގެ މަޞްލަޙަތަށް ރިޢާޔަތްކުރެވޭނީ އަމުރު ނުނެރުމުން ކަމަށެވެ. އެހެންކަމުން ވަގުތީ އަމުރު ނުނެރުމަށް ނިންމިއެވެ.

އެޓަރނީ ޖެނެރަލްގެ އޮފީހުގެ ސީނިއަރ ސްޓޭޓް ކައުންސެލަކަށް އަޚްލާޤީ މިންގަނޑަށް ތަބާނުވުމުން ލިޔުމުން އިންޒާރު ދީފައިވެއެވެ. އެކަމާ ގުޅިގެން ޓްރައިބިއުނަލަށް ހުށަހެޅި މައްސަލައިގައި، އެ އިންޒާރުގެ މައްޗަށް ބިނާކޮށް އިތުރު ފިޔަވަޅެއް ނާޅާތި ބެހެއްޓުމަށް ވަގުތީ އަމުރަކަށް އެދުނެވެ.

އިސްތިއުނާފުކުރި ފަރާތުން ބުނީ ވަޒީފާގެ ޙައްޤަށް ލިބޭ ގެއްލުމަކީ އިޢާދަނުކުރެވޭނެ ގެއްލުމެއްކަމަށާއި، ބެލެންސް އޮފް ކޮންވީނިއަންސްއާ ގުޅޭ ނުކުތާއަށް ޖަވާބުދާރީވުމުގެ ފުރުޞަތު ނުދީ ނިންމާފައިވާކަމަށެވެ. ކޮމިޝަނުން ބުނީ ބަދަލު ހޯދިދާނެތީ ގެއްލުމަކީ އިޢާދަނުކުރެވޭނެ ގެއްލުމެއް ނޫންކަމަށާއި، ދައުލަތުގެ މަޞްލަޙަތު ބޮޑުކަމަށެވެ.

ދެފަރާތުގެ މެދުގައި ދެބަސްވުމެއް ނެތި، ސިވިލް ސަރވިސް ކޮމިޝަނުން ފިޔަވަޅެއް ނާޅާނެކަމުގެ ޔަޤީންކަން ދީފައިވާއިރު، އިޢާދަނުކުރެވޭނެ ގެއްލުމެއް ނެތްކަމަށް ވަޒީފާއާބެހޭ ޓްރައިބިއުނަލުން އަމިއްލަ އިސްނެގުމުގައި ކަނޑައަޅައި ވަގުތީ އަމުރު ނުނެރުމަކީ ރަނގަޅު ނިންމުމެއްތޯ، އަދި ޓްރައިބިއުނަލުގައި ނުހުށަހަޅާ ދިފާޢުތައް އިސްތިއުނާފު މަރުޙަލާގައި ބަލައިގަނެވޭނެތޯ.

ޓްރައިބިއުނަލުގެ ވަގުތީ އަމުރާމެދު ނިންމި ގޮތް ބާޠިލު؛ ހައިކޯޓުން ވަގުތީ އަމުރު ނެރުނު

ކޮމިޝަނުން ޓްރައިބިއުނަލުގައި އެދުމަށް އިންކާރުނުކޮށް ފިޔަވަޅު ނާޅާނެ ޔަޤީންކަން ދީފައިވާއިރު، ޓްރައިބިއުނަލުން ދެބަސްވުމެއް ނެތި ޝަރުޠެއް ފުރިހަމަނުވާކަމަށް ކަނޑައެޅީ ގޯހެއް ކަމަށާއި، ކޮމިޝަނުން ހައިކޯޓުގައި ހުށަހެޅީ ޓްރައިބިއުނަލުގައި ނުހުށަހަޅާ އައު ދިފާޢުތައް ކަމަށްވާތީ އެ ދިފާޢުތައް ބަލައިނުގަނެވޭނެ ކަމަށް ކޯޓުން ކަނޑައެޅިއެވެ.