އިބްރާހިމް ނަސީމް ވ. މިނިސްޓްރީ އޮފް ޓޫރިޒަމް

ޤާނޫނީ ގޮތުން ބަނދެވޭ ލިޔުމުން ވާ ކޮންޓްރެކްޓެއް ނެތުމާއި، މުއްދަތުގައި ފައިސާ ނުދައްކާތީ ހުށަހެޅުން ބާޠިލުވެފައިވާތީ ދަޢުވާ ސާބިތުނުވާކަމަށް ސިވިލް ކޯޓުން ކަނޑައެޅިއެވެ.

އެމް.އެމް.ޕީ.އާރ.ސީން ރިސޯޓަކަށް ތަރައްޤީކުރުމަށް ލެގޫނެއް ހުށަހަޅައި، 30 ދުވަހުގެ ތެރޭގައި 600,000 ޑޮލަރުގެ ލީސް އެކުއިޒިޝަން ކޮސްޓް ސަރުކާރަށް ނުދައްކައިފިނަމަ ހުށަހެޅުން ބާޠިލުވާނެކަމަށް ސިޓީގައި ބަޔާންކޮށްފައިވިއެވެ. އެ މުއްދަތުގައި ފައިސާ ނުދައްކައި، ލެގޫން ހަވާލުކުރުމަށް އެދި މިނިސްޓްރީ އޮފް ޓޫރިޒަމްގެ މައްޗަށް ދަޢުވާކުރިއެވެ.

މުއްދަތުގެ ތެރޭގައި ފައިސާ ދައްކަން އެމް.އެމް.ޕީ.އާރ.ސީއަށް ދިއުމުން ބަލައިނުގަތުމަކީ މިނިސްޓްރީގެ ޒިންމާ އަދާނުކުރުމެއްކަމަށާއި، އެ ސަބަބަށް ރިޢާޔަތްނުކޮށް ޤާނޫނުއަސާސީގެ 42 (ށ) ގެ ޢަދުލުވެރިކަން ގެއްލޭ ގޮތަށް މައްސަލަ ނިންމިކަމަށް އިސްތިއުނާފުކުރި ފަރާތުން ބުންޏެވެ.

ރިސޯޓަކަށް ތަރައްޤީކުރުމަށް ފަޅެއް ދިނުމަށް ހުށަހެޅި އޮފަރ ލެޓަރގައިވާ މުއްދަތުގައި ލީސް އެކުއިޒިޝަން ކޮސްޓް ސަރުކާރަށް ނުދައްކައި، ފައިސާ ބަލައިގަތުމަށް ކަނޑައެޅިފައިނުވާ ފަރާތެއް (އެމް.އެމް.ޕީ.އާރ.ސީ) އަށް ދައްކަން ގޮސް ބަލައިނުގަތުމުން، ފަޅު ހަވާލުކުރުމަށް މިނިސްޓްރީ އޮފް ޓޫރިޒަމަށް އަމުރުކުރެވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ފައިސާ ދައްކަންޖެހެނީ ސަރުކާރަށްކަން އޮފަރ ލެޓަރުން ސާފުކޮށް އެނގޭއިރު، މުއްދަތުގައި ފައިސާ ދެއްކިކަމުގެ ހެއްކެއް ނެތެވެ. ކަނޑައެޅިފައިވާ ގޮތާ ޚިލާފަށް އެމް.އެމް.ޕީ.އާރ.ސީއަށް ދައްކަން މަސައްކަތްކުރުމުގެ ނަތީޖާ ތަޙައްމަލުކުރަންޖެހޭނީ އެގޮތަށް ޢަމަލުކުރި ފަރާތުންނެވެ.