ޙުސައިން ޝަކީބް ވ. އަޙްމަދު ޝާހް

ޓްރައިބިއުނަލުން ނިންމީ އެކަށީގެންވާ ސަބަބެއް ނެތި ވަޒީފާއިން ވަކިކޮށްފައިވާތީ ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 29 ވަނަ މާއްދާގެ ދަށުން 4,704/60ރ. ބަދަލާއި ރަމަޟާން މަހުގެ ޢިނާޔަތަށް 3,000ރ. ނަގައިދިނުމަށެވެ. އެހެން ޢިނާޔަތްތައް ނަގައިދޭނެ ހަމައެއް ނުފެނެއެވެ.

ގެސްޓްހައުސްއެއްގެ އޮޕަރޭޝަނަލް އިންޗާޖްގެ މަޤާމުގައި 01 ޑިސެންބަރު 2017 އިން ފެށިގެން ވަޒީފާ އަދާކުރި މުވައްޒަފަކު 01 ޖުލައި 2018 އިން ފެށިގެން ވަޒީފާއިން ވަކިކުރުމުން، ޢިނާޔަތްތަކާއި ވަޒީފާއަށް ރުޖޫޢަކުރުމާއި ބަދަލަށް އެދި ޓްރައިބިއުނަލަށް ހުށަހެޅި މައްސަލައެކެވެ.

އިސްތިއުނާފުކުރި ފަރާތުން ބުނީ ވަޒީފާއަށް ރުޖޫޢަކުރުމަށް އަމުރުނުކޮށް ހަމައެކަނި ބަދަލު ދިނުމަކީ ޤާނޫނާ ޚިލާފު ކަމަށާއި، އޭނާ އެދުނު ކަންކަމަށް ޓްރައިބިއުނަލުން ނަޒަރުނުކުރި ކަމަށެވެ.

ވަޒީފާއާބެހޭ ޓްރައިބިއުނަލުން ވަޒީފާއަށް އަނބުރާ ރުޖޫޢަކުރުމަށް އަމުރުނުކޮށް ޤާނޫނު ނަންބަރު 2/2008 ގެ 29 ވަނަ މާއްދާގެ ދަށުން ހަމައެކަނި ބަދަލު ނަގައިދިނުމަށް ނިންމުމާއި، ކަނޑައެޅި ބަދަލުގެ މިންވަރާއި، ޓްރައިބިއުނަލުން މުވައްޒަފުގެ އެދުންތަކަށް ނަޒަރުނުކުރި ކަމަށް ބުނާ ނުކުތާ ޞައްޙަތޯ.

އިސްތިއުނާފު ބާޠިލް، ޓްރައިބިއުނަލުގެ ނިންމުން ޤާއިމް

ވަޒީފާއަށް އަނބުރާ ދިނުމަށް އެދުން މުވައްޒަފު ޓްރައިބިއުނަލުގައި ދޫކޮށްލާފައިވާތީ އެ ނުކުތާ ބަލައިނުގަނެވޭ ކަމަށާއި، ޓްރައިބިއުނަލުން ބަދަލު ކަނޑައަޅާނީ އެކަށީގެންވާ ޢަދުލުވެރި މިންވަރަކަށް ކަމަށާއި، ސީދާ ގެއްލުމެއް ބަޔާންކޮށްދީފައި ނުވާތީ ނިންމުމަށް ބަދަލު ގެންނަން ނުޖެހޭ ކަމަށެވެ.