ޙުސައިން ރަޝީދު ވ. ސްޓޭޓް އިލެކްޓްރިކް ކޮމްޕެނީ ލިމިޓެޑް

އަލިފާން ރޯވީ ސްޓެލްކޯގެ އިހުމާލުން، ފޮށީގެ ސަބަބުންކަން ސާބިތުނުވާތީ ގެއްލުމަށް ސްޓެލްކޯ ޒިންމާނުކުރެވޭނެކަމަށް ސިވިލް ކޯޓުން ޙުކުމްކުރިއެވެ.

އިސްތިއުނާފުކުރި ފަރާތުގެ ދެބުރި ފިހާރަ އަލިފާނުގެ ޙާދިޘާއެއްގައި އަނދައިގެން ދިޔައީ ފިހާރައާއި ދުވާރާ ދެމެދު ސްޓެލްކޯއިން ބަހައްޓާފައިހުރި ކަރަންޓް ޑިސްޓްރިބިއުޝަން ފޮށީގައި ރޯވެގެން ކަމަށް ބުނެ، 33 މިލިއަން ރުފިޔާގެ ބަދަލު ހޯދަން ދަޢުވާކުރިއެވެ.

ދަށުކޯޓުން ޙާދިޘާ ފެނުނު ތިން ހެކިންގެ ބަހާއި ފޮޓޯ، ވީޑިއޯއަށް ނުބަލައި، މުވައްޒަފުންނާއި އެމް.އެން.ޑީ.އެފްގެ ބަސް ނުހޯދައި، ހަމައެކަނި ދަޢުވާލިބޭ ފަރާތުން ހުށަހެޅި ފޮރެންސިކް ރިޕޯޓަށް ބަލައި ޙުކުމްކުރީ ޤާނޫނުއަސާސީގެ 20 ވަނަ މާއްދާއާ ޚިލާފަށް ކަމަށް އިސްތިއުނާފުކުރި ފަރާތުން ބުނެފައިވެއެވެ.

ފިހާރައެއް އަނދައިގެން ދިޔަ އަލިފާނުގެ ޙާދިޘާއަކީ ސްޓެލްކޯގެ ކަރަންޓް ޑިސްޓްރިބިއުޝަން ފޮށީގެ ސަބަބުން، އެކުންފުނީގެ އިހުމާލުން ހިނގި ކަމެއްކަން ސާބިތުވޭތޯއާއި، ދަށުކޯޓުން ލޮލަށް ފެނުނު ހެކިންގެ ބަހަށްވުރެ ފޮރެންސިކް ރިޕޯޓަށް ބުރަދަން ދިނުމަކީ ޞައްޙަ ކަމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ފޮރެންސިކް ރިޕޯޓުން ފޮށީގެ ކޭބަލްތައް ރޯވެފައިނުވާކަން އެނގޭއިރު، ހެކިންނަށް ފެނުނީ ފޮށީގެ މަތީގައި ރޯވެފައިހުރި ތަންކަމުން އަލިފާން ފެށުނުތަން ސާބިތުނުވެއެވެ؛ މީގެ އިތުރުން ޤާނޫނީ ވާޖިބާއި އެއަށް ޚިލާފުވުން ސާބިތުކޮށްދެވިފައި ނުވެއެވެ.