ޙަސަން ޝިވާޒް ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ތުހުމަތުކުރެވުނު ފަރާތް ޝަރީޢަތުގައި ކުށަށް އިޢުތިރާފުވީތީ ކުށް ސާބިތުކޮށް، އުމުރަށް ޖަލަށްލުމާއެކު 100,000 ރުފިޔާ ޖުރުމާނާކުރިއެވެ.

ސައިކަލުގައި ދަނިކޮށް ފުލުހުން ހުއްޓުވުމުން، އިސްތިއުނާފުކުރި ފަރާތުގެ އަތުގައި އޮތް ކޮތަޅު ފަޅާލުމުން އޭގެ ތެރެއިން އެޅުނު ތަކެއްޗާއި ސައިކަލުގައި އަދި ކޮތަޅުގައި ހުރި ތަކެތީގައި ޑައިމޯފިން ހުރިކަމަށް ތަޙުލީލުން ދެއްކުމުން، ޑައިމޯފިން ޓްރެފިކްކުރުމުގެ ދަޢުވާ ކުރެވުނެވެ.

އިސްތިއުނާފުކުރި ފަރާތުން ބުނީ ތަޙްލީލު ރިޕޯޓާ ބެހޭގޮތުން ސުވާލުނުކުރާ ކަމަށާއި ބަރުދަން ބަލާފައިވަނީ ޤާނޫނާ ޚިލާފަށް ކަމަށާއި ޗެއިން އޮފް ކަސްޓަޑީ ފުރިހަމަނުވާ ކަމަށެވެ. ދައުލަތުން ބުނީ ދަށު ކޯޓުގައި ނުފާހަގަކުރާ ކަންކަން އިސްތިއުނާފުގައި ނުބެލޭނެ ކަމަށާއި ކުށަށް އިޢުތިރާފުވެފައިވާ ކަމަށެވެ.

ޑައިމޯފިން ޓްރެފިކްކުރުމުގެ ކުށަށް ޝަރީޢަތުގައި އިޢުތިރާފުވެގެން ކުށް ސާބިތުވި މައްސަލައެއްގައި، ތަޙްޤީޤުގެ އިޖުރާއަތު (ތަޙްލީލު ރިޕޯޓާ ބެހޭ ސުވާލުކުރުން، ބަރުދަން ބެލުން، ޗެއިން އޮފް ކަސްޓަޑީ) ފުރިހަމަނުވާ ކަމަށް ދަށު ކޯޓުގައި ނުފާހަގަކޮށް އިސްތިއުނާފުގައި ފުރަތަމަ ފަހަރަށް ހުށަހަޅާ ނުކުތާތަކަށް ހައިކޯޓުން ރިޢާޔަތްކުރެވޭނެތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަށު ކޯޓުގައި ހެކި ހުށަހެޅުމާއި ހެކިވެރިންނާ ސުވާލުކުރުމުގެ ފުރުޞަތު ލިބުނު ނަމަވެސް އިސްތިއުނާފީ ނުކުތާތަކުގައިވާ ކަންކަން ދަށު ކޯޓުގައި ފާހަގަކޮށްފައި ނުވާތީއާއި، ކުށް ސާބިތުވީ ޤަޟާއީ އިޢުތިރާފުން ކަމަށްވާއިރު އެ އިޢުތިރާފާމެދު ސުވާލު އުފައްދާފައި ނުވާތީ، ޙުކުމަށް ބަދަލު ގެންނަންޖެހޭ ސަބަބެއް ނެތެވެ.