ގއ. ވިލިނގިލި ކައުންސިލް ވ. މުޙައްމަދު އީމާން

ގައިޑްލައިންގެ އެ ނުކުތާއަކީ ބިމާބެހޭ ޤާނޫނާއި ގަވާއިދުން ބާރުލިބިގެން ހަދާފައިވާ އުޞޫލެއް ނޫންކަމަށާއި އެ ގަވާއިދުގެ މަފްހޫމާ ތަޢާރުޟުވާ ބާޠިލު ނުކުތާއެއްކަމަށް ކަނޑައަޅައި، އުނިކުރި 60 ޕޮއިންޓް ދިނުމަށް ވިލިނގިލި މެޖިސްޓްރޭޓް ކޯޓުން ކައުންސިލަށް އަމުރުކުރިއެވެ.

2012 ވަނަ އަހަރު ގއ. ވިލިނގިލިން ބަންޑާރަ ގޯތި ދޫކުރުމަށް ހުޅުވާލުމުން ކުރިމަތިލި ފަރާތުގެ އަނބިމީހާއަށް ވާރިސުންގެ ނަމުގައި ރަޖިސްޓްރީކުރެވިފައިވާ ގޯއްޗަކުން 1226 އަކަފޫޓު ލިބެން އޮތުމުން، ކައުންސިލުގެ ގައިޑްލައިންގެ 12 ވަނަ މާއްދާގެ ދަށުން 60 ޕޮއިންޓް އުނިކޮށްފައިވެއެވެ. އެ ނިންމުން ބާޠިލުކޮށް ޕޮއިންޓް ދިނުމަށް އަމުރުކުރުމަށް އެދި އޭނާ ދަޢުވާކުރިއެވެ.

ދައުލަތުން ބުނީ ގައިޑްލައިންގެ 17 (2) ގެ ދަށުން 600 އަކަފޫޓުގެ ގޯއްޗެއް ލިބިފައިވާކަން ބަލަނީ ރަޖިސްޓްރީއިންކަމަށާއި، ގަވާއިދުގެ 7 (ރ) ނުބައިކޮށް ތަޠްބީޤުކުރިކަމަށާއި، ބިމާބެހޭ ޤާނޫނުގެ 11 (ރ) އާއި ގަވާއިދުގެ 10 އާއި 16 (ށ) އަށް ރިޢާޔަތް ނުކުރިކަމަށާއި، އެދިފައިނުވާ ކަމަކަށް ނިންމުމަކީ 2013/SC-A/44 އާ ޚިލާފުކަމަށެވެ.

ގޯއްޗަށް އެދޭ މީހާގެ އަނބިމީހާއަށް ވާރިސުންގެ ނަމުގައި ރަޖިސްޓްރީކުރެވިފައިވާ ގޯއްޗަކުން 600 އަކަފޫޓަށްވުރެ ބޮޑު ބައެއް ލިބެން އޮތުމުން ކައުންސިލުގެ ގައިޑްލައިންގެ ދަށުން 60 ޕޮއިންޓް އުނިކުރުމަކީ ޤާނޫނާއި ގަވާއިދާ އެއްގޮތްވާ ކަމެއްތޯއާއި، ފަރާތްތަކުން އެދިފައިނުވާ ގޮތަކަށް ގައިޑްލައިންގެ ނުކުތާއެއް ބާޠިލުކަމަށް ދަށުކޯޓަށް ކަނޑައެޅޭނެތޯ.

ދަށުކޯޓުގެ ޙުކުމް ބާޠިލު

އަނބިމީހާ ވާރިސުންގެ ނަމުގައިވާ ރަޖިސްޓްރީގައި ހިމެނޭކަމާއި ޕޮއިންޓް ދިންއިރު އެ ބައި ދޫކޮށްލާފައި ނުވާތީ ޕޮއިންޓް އުނިކުރީ ޤާނޫނާއި ގަވާއިދާއި ގައިޑްލައިނާ އެއްގޮތަށެވެ. ގައިޑްލައިންގެ ނުކުތާ ބާޠިލުކުރުމަށް ދަޢުވާގައި އެދިފައި ނުވާތީ، އެ ނުކުތާ ބާޠިލުކަމަށް ކަނޑައެޅުމަކީ 2013/SC-A/44 ގެ އުޞޫލާ ޚިލާފެވެ.