ފުށިފަރު އިންވެސްޓްމެންޓް ޕވޓ ލޓޑ ވ. އަޙްމަދު ސިނާން

ޓްރައިބިއުނަލުން، މުވައްޒަފަކީ އިސްމަޤާމެއްގައި ހުރި މީހެއްކަމާއި ވަކިކުރީ ޕްރޮބޭޝަން މުއްދަތުގައިކަން ސާބިތުނުވާތީ، ޤާނޫނާ ޚިލާފަށް ވަކިކުރިކަމަށް ކަނޑައަޅައި 206,066.66 ރުފިޔާގެ ބަދަލާއި ވަޒީފާ އަދާކުރިކަމުގެ ލިޔުން ދިނުމަށް ނިންމިއެވެ.

ކުންފުނީގައި ކޮންސްޓްރަކްޝަން މެނޭޖަރގެ ވަޒީފާ އަދާކުރަމުން ދިޔަ މުވައްޒަފަކު ޕްރޮބޭޝަން މުއްދަތުގައި ފެންވަރު ނުދައްކާކަމަށް ބުނެ ވަކިކުރުމުން، ޤާނޫނާ ޚިލާފަށް ވަކިކުރިކަމަށް ބުނެ ޓްރައިބިއުނަލަށް ހުށަހެޅިއެވެ. ކުރީގައި ޓްރައިބިއުނަލުން ބަލައިނުގަތް މައްސަލަ ހައިކޯޓުގެ 2016/HC-A/401 އިން ޓްރައިބިއުނަލަށް ތަޙްވީލުކުރިއެވެ.

ކުންފުނިން ބުނީ މުވައްޒަފަކީ ހިންގުމުގެ އިސްމަޤާމެއްގައި ހުރި މީހެއްކަމުން ޓްރައިބިއުނަލަށް އިޚްތިޞާޞް ނެތްކަމަށާއި އެ ނުކުތާއަށް ޓްރައިބިއުނަލުން ރިޢާޔަތްނުކުރި ކަމަށެވެ.

ކުންފުނީގެ ކޮންސްޓްރަކްޝަން މެނޭޖަރގެ ވަޒީފާއިން ވަކިކުރި މުވައްޒަފަކީ ވަޒީފާއާބެހޭ ޤާނޫނުގެ 34 ވަނަ މާއްދާގެ (ހ) ގައިވާ ހިންގުމުގެ އިސްމަޤާމެއްގައި ހުރި މީހެއްކަމުން، އޭނާގެ ޝަކުވާ ބެލުމުގެ އިޚްތިޞާޞް ވަޒީފާއާބެހޭ ޓްރައިބިއުނަލަށް ނުލިބޭތޯ.

އިސްތިއުނާފު ބާޠިލް، ޓްރައިބިއުނަލުގެ ނިންމުން ޤާއިމް

ކުންފުނިން ހުށަހެޅި އޮނިގަނޑުގެ ސައްޙަކަމާމެދު ސުވާލު އުފެދޭތީއާއި، ވަކި ޕްރޮޖެކްޓަކަށް ޢައްޔަންކުރި ކޮންސްޓްރަކްޝަން މެނޭޖަރެއްގެ މަޤާމަކީ ހިންގުމާ ގުޅޭ އިސްމަޤާމެއްކަމަށް ބަލަންޖެހޭ ހުއްޖަތެއް ކުންފުނިން ހުށަނާޅާތީ، ޓްރައިބިއުނަލުގެ ނިންމުމަށް ބަދަލު ގެނައުމުގެ ހަމައެއް ނެތެވެ.