ފާޠިމަތު ރިޒްވީން ވ. ބޭންކް އޮފް މޯލްޑިވްސް

ބޭންކުގެ އިހުމާލެއް އޮތްކަން ސާބިތުނުވާތީ، އެދިފައިވާ ފައިސާއަކީ ބޭންކުން ދޭންޖެހޭ ފައިސާއެއް ކަމަށް ކަނޑައަޅާނެ ޤާނޫނީ ހަމައެއް ނެތްކަމަށް ސިވިލް ކޯޓުން ޙުކުމްކުރިއެވެ.

ވިޔަފާރި ނަމެއްގެ ނަމުގައި ބޭންކް އޮފް މޯލްޑިވްސްގައި ހުޅުވާފައިވާ އެކައުންޓުގެ 21 ޗެކަށް، އެކައުންޓުގެ ވެރިފަރާތުގެ ހުއްދަނެތި ވަގު ޑޮކިއުމެންޓެއް ހުށަހެޅި ބަޔަކަށް ބޭންކުން ފައިސާ ދޫކުރީ އިހުމާލުން ކަމަށް ބުނެ، އެ ފައިސާއާއި ގެއްލުމުގެ ބަދަލު ހޯދުމަށް ދަޢުވާކުރިއެވެ. ޗެކްތައް ވީދާލާފައިވާކަން ބޭންކަށް އަންގާފައިވަނީ ޗެކްތަކަށް ފައިސާ ނަގާ ނިމުމަށްފަހުއެވެ.

ހައިކޯޓުގެ 2014/HC-A/129 ޤަޟިއްޔާގައި ބަޔާންކުރި ބޭންކާއި ކަސްޓަމަރާ ދެމެދު އަމާނާތުގެ ގުޅުމާއި ބޭންކުގެ ރައްކާތެރިކަމުގެ އުޞޫލު ދަށުކޯޓުން ތަޠްބީޤުނުކުރިކަމަށް އިސްތިއުނާފުކުރި ފަރާތުން ބުނެފައިވެއެވެ.

ވީދާލާފައިވާ ޗެކްތަކަށް ބޭންކުން ފައިސާ ދޫކުރުމުގައި ބޭންކުގެ އިހުމާލެއް އޮތްކަން ސާބިތުވޭތޯއާއި، ހައިކޯޓުގެ 2014/HC-A/129 ޤަޟިއްޔާގައި ބަޔާންކުރި ބޭންކާއި ކަސްޓަމަރާ ދެމެދު އަމާނާތުގެ ގުޅުމުގެ އުޞޫލު ދަށުކޯޓުން ތަޠްބީޤުނުކުރުމަކީ ޙުކުމް ބާޠިލުކުރަންޖެހޭ ސަބަބެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

2014/HC-A/129 ގައި ފައިސާ ޓްރާންސްފަރ ކުރީ ސޮއި ދިމާނުވާ ފެކްސްތަކެއްގެ މައްޗަށް ފަރާތް ކަށަވަރުނުކޮށެވެ؛ މިމައްސަލާގައި ސޮއި ސާމްޕަލް ސޮއިއާ ދިމާވާ ފުރިހަމަ ޗެކްތަކަށް ފައިސާ ދޫކޮށްފައިވާއިރު ޗެކްފޮތް ބެލެހެއްޓުމަކީ ވެރިފަރާތުގެ ޒިންމާއެއް ކަމަށާއި ގެއްލުން އަންގާފައިވަނީ ފައިސާ ނެގުމަށްފަހު ކަމުން ޙުކުމަށް ބަދަލު ގެންނަ ސަބަބެއް ނެތެވެ.