ޢަލީ މޫސާ ވ. މުޙައްމަދު އަފީފް

އިސްތިއުނާފުކުރި ފަރާތް އަޑުއެހުންތަކަށް ޙާޟިރުނުވުމުން ޣައިރު ޙާޟިރުގައި މައްސަލަ ހިންގައި، 4,000,000 ރުފިޔާ ދައްކަންޖެހި ނުދައްކައިވާކަން ސާބިތުވާކަމަށް ކަނޑައަޅައި ދެއްކުމަށް ސިވިލް ކޯޓުން ޙުކުމްކުރިއެވެ.

ދައްކަންޖެހޭ 4,000,000 ރުފިޔާ ނުދައްކާތީ އެ ފައިސާ ހޯދުމަށް ސިވިލް ކޯޓުގައި ދަޢުވާކުރިއެވެ. އިސްތިއުނާފުކުރި ފަރާތުގެ ނަމުގައިވާ ލޯކަލް އިންވެސްޓެއްގެ އެކައުންޓުން 4 މިލިއަން ރުފިޔާގެ ޗެކެއް ދޫކޮށްފައިވާއިރު، އެކައުންޓުގައި ފައިސާ ނެތުމުން ޗެކު އަނބުރާ ރައްދުވިއެވެ.

އިސްތިއުނާފުކުރި ފަރާތް ބުނީ، ދަށުކޯޓުން ފަނޑިޔާރުންގެ ޤާނޫނުގެ 5 (ހ) އާއި 5 (ށ) (1) އާއި (2) ގައިވާ ކަންކަމަށް ރިޢާޔަތް ނުކުރާ ކަމަށެވެ.

ދަޢުވާ ރައްދުވާ ފަރާތުގެ ޣައިރު ޙާޟިރުގައި ނިންމި ފައިސާ ހޯދުމުގެ މައްސަލައެއްގައި، ދަށުކޯޓުގައި ނުނަގާ ނުކުތާއެއް އިސްތިއުނާފުގައި ބަލައިގަނެވޭނެތޯއާއި، ޤާނޫނީ ޝަކުލިއްޔާތު ފުރިހަމަ ޗެކެއްގެ ބިނާގައި ފައިސާ ދައްކަން ޖެހޭކަން ސާބިތުވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ފުރަތަމަ ނުކުތާއަކީ ދަށުކޯޓުގައި ނުނަގާ، މަޤްބޫލު ސަބަބެއް ނެތި ޙާޟިރުނުވެ ދިފާޢުވުމުގެ ފުރުޞަތު ދޫކޮށްލި ނުކުތާއެއް ކަމުން އިސްތިއުނާފުގައި ބަލާކަށް ނުޖެހެއެވެ. ޝަކުލިއްޔާތު ފުރިހަމަ ޗެކެއް ދޫކޮށްފައިވާއިރު، ޗެކު ނުދިންކަން ސާބިތުނުކުރާތީ ޗެކުގެ ފައިސާ ދައްކަންޖެހޭކަން ސާބިތުވެއެވެ.