ފަރުހާދު އިބްރާހީމް ވ. ޕްރިމިއަރ ޕްރޮޕަރޓީ ޕވޓ ލޓޑ

ޚިދުމަތުގެ އަގަކީ ދައްކަންޖެހޭ ފައިސާއެއް ނަމަވެސް ޢަދަދު ހިސާބުކުރި ގޮތް ނޭނގޭތީ ނަގައިނުދީ، އެ ގޮތް އެނގޭނެ ގޮތަށް އަލުން ދަޢުވާކުރުމުގެ ޙައްޤު ދޫކޮށްލައި، ވަކީލު ފީގެ ގޮތުގައި 8000 ރުފިޔާ ދައްކަން ސިވިލް ކޯޓުން ޙުކުމްކުރިއެވެ.

ކޮންޑޮމީނިއަމް ބިލްޑިންގެއް މެނޭޖްކުރާ ކުންފުނިން، އެޕާޓްމަންޓެއްގެ ވެރިފަރާތުން ކޮމަން އޭރިއާގެ އިންޝުއަރެންސް ފީއާއި މެއިންޓެނަންސް ފީ 21,290.80 ރުފިޔާ ނުދެއްކި ހުރުމުން، އެ ފައިސާއާއި ޖޫރިމަނާއާއި ވަކީލު ފީ ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ވަކީލު ފީ ނަގައިދިނުމަކީ 2009/HC-A/348 އާއި 2013/HC-A/218 އާއި ހިންގާ ގަވާއިދުގެ 13 ވަނަ މާއްދާއާ ޚިލާފު ކަމަށެވެ. ރައްދުވި ފަރާތުން ބުނީ ވަކީލު ފީ ބޭނުން ނުވާ ކަމަށާއި އެ ފީ މާފުކުރި ކަމަށެވެ.

ދަޢުވާކުރި ފައިސާ ނަގައިނުދީ، އަލުން ދަޢުވާކުރުމުގެ ފުރުޞަތު ދޫކޮށްލާފައިވާ ޙާލަތެއްގައި، ދަޢުވާކުރި ފަރާތަށް ޤާނޫނީ ވަކީލު ފީގެ ގޮތުގައި 8000 ރުފިޔާ ނަގައިދިނުމަކީ ޤާނޫނާއި ހައިކޯޓުގެ ސާބިޤާތަކާ އެއްގޮތް ނިންމުމެއްތޯ.

ދަށުކޯޓުގެ ޙުކުމުން ވަކީލު ފީ (8000 ރުފިޔާ) ނަގައިދިން ބައި ބާޠިލު

ދަޢުވާ ސާބިތުނުވެ، އަލުން ދަޢުވާކޮށް ވަކީލު ފީ ހޯދުމުގެ ފުރުޞަތު ލިބިފައިވާތީ ވަކީލު ފީ ދެ ފަހަރަށް ލިބުމުގެ ފުރުޞަތު ފަހިވާނެ ކަމާއި، ބައެއް ސާބިތުނުވާ ދަޢުވާއެއްގައި މުޅި ފީ ނަގައިދިނުން އިންޞާފުވެރި ނޫން ކަމަށް ބަލައި ވަކީލު ފީ ނަގައިދިން ބައި ބަދަލުކުރިއެވެ.