ސިވިލް ސަރވިސް ކޮމިޝަން ވ. އިސްޙާޤު އަޙްމަދު

ވަޒީފާއާބެހޭ ޓްރައިބިއުނަލުން ވަކިކުރުމުގައި މައުޟޫޢީ އަދި އިޖުރާއީ ޢަދުލުވެރިކަން ޤާއިމުނުވާތީ، ވަޒީފާއަށް ރުޖޫޢަކޮށް، ވަކިކުރެވިފައިހުރި މުއްދަތުގެ މުސާރައާއި ޢިނާޔަތްތައް ދިނުމަށް ނިންމިއެވެ.

މިނިސްޓްރީ އޮފް ކޮމިއުނިކޭޝަން، ސައެންސް އެންޑް ޓެކްނޮލޮޖީގެ ޑިރެކްޓަރ ޖެނެރަލްގެ މަޤާމަށް ޢައްޔަންކޮށް ދާއިމީކުރި މުވައްޒަފެއް، އެހެން ކެންޑިޑޭޓެއްގެ ޝަކުވާއާ ގުޅިގެން މާކްސް އަލުން ބެލުމުން އެ ފަރާތަށް މަތިން މާކްސް ލިބޭކަމަށް ފެނުމުން، ޝަކުވާ އަނބުރާ ގެންދިޔަތާ މަސްތަކެއް ފަހުން ސިވިލް ސަރވިސް ކޮމިޝަނުން ވަޒީފާއިން ވަކިކުރިއެވެ.

ކޮމިޝަނުން ބުނީ 47 (ނ)(1) ގެ ދަށުން މުވައްޒަފުގެ ޚިލާފެއް ބަލަން ނުޖެހޭކަމަށާއި ނިންމުމުން އެއް މަޤާމަށް ދެމީހަކު ޢައްޔަންކުރަން މަޖުބޫރުވާކަމަށެވެ. މުވައްޒަފުން ބުނީ ކޮމިޝަނުގެ އިހުމާލަކަށް 47 (ނ)(1) ބޭނުންކުރުން މަނާކަމަށެވެ.

ވަޒީފާއަށް ޢައްޔަންކުރުމުގައި މާކްސް ދިނުމުގައި ސިވިލް ސަރވިސް ކޮމިޝަނުގެ މުވައްޒަފުންގެ އިހުމާލުން ހިނގި ގޯހަކަށް ބިނާކޮށް، ދާއިމީކޮށްފައިވާ މުވައްޒަފަކު ސިވިލް ސަރވިސްގެ ޤާނޫނުގެ 47 (ނ)(1) ގެ ދަށުން ވަކިކުރުމަކީ އެކަށީގެންވާ ސަބަބެއް ނެތި ވަކިކުރުމެއްތޯ.

އިސްތިއުނާފު ބާޠިލް، ޓްރައިބިއުނަލުގެ ނިންމުން ޤާއިމް

މުވައްޒަފުގެ ފަރާތުން އެއްވެސް ޚިލާފެއް ސާބިތުނުވާއިރު، ގޯސް ހިނގީ ކޮމިޝަނުގެ މުވައްޒަފުންގެ އިހުމާލުންނެވެ؛ ޝަކުވާ އަނބުރާ ގެންގޮސްފައިވެއެވެ؛ ވަޒީފާގެ ޙައްޤު އެންމެ ފުޅާކޮށް ޙިމާޔަތްކުރަންޖެހޭތީ ޓްރައިބިއުނަލުގެ ނިންމުން ރަނގަޅެވެ.