2018/HC-A/67

ސިވިލް ކޯޓުން ދަރަނިއާއި ޖޫރިމަނާއާއި ޗެކް ބައުންސްވުމުގެ ފައިސާ ހިމެނޭގޮތަށް 543,447 ރުފިޔާ 6 މަހުގެ ތެރޭގައި ދައްކަން ޙުކުމްކޮށް، ނުދައްކައިފިނަމަ ރަހުނު ވިއްކުމަށް ކޯޓަށް ހުށަހެޅުމުގެ ޙައްޤު ކުންފުންޏަށް ލިބޭކަމަށް ކަނޑައެޅިއެވެ.

ތެލުގެ ބާވަތްތައް ކްރެޑިޓަށް ދޫކުރުމުގެ އެއްބަސްވުމެއްގެ ދަށުން ދޫކުރި ތެލުގެ އަގު ނުދައްކައި، ދުވާލަކު %2.25 ގެ ޖޫރިމަނާއާއެކު ފައިސާ ހޯދުމަށް ކުންފުނިން ދަޢުވާކުރިއެވެ. ދަރަނިވެރިޔާ ރަހުނުކުރި ވެހިކަލްތައް ވިއްކާލައިގެން ފައިސާ ހޯދުމަށް ކުންފުންޏަށް ސިޓީއަކުން އެދިފައިވެއެވެ.

އިސްތިއުނާފުކުރި ފަރާތުން ބުނީ މައްސަލަ ބެލި ސެކްޝަނަށް އިޚްތިޞާޞް ނެތްކަމަށާއި، ދެއްކި ފައިސާގެ ހެކިތަކަށް ރިޢާޔަތް ނުކުރިކަމަށާއި، ދެއްކި ފައިސާ އުނިނުކޮށް ޖޫރިމަނާ ނަގައިދީފައިވާކަމަށެވެ.

ކްރެޑިޓަށް ތެޔޮ ދޫކުރުމުގެ އެއްބަސްވުމެއްގެ ދަށުން ނުދައްކާ ހުރި ފައިސާއަށް ޖޫރިމަނާ ނަގާނީ ކޮން ތާރީޚަކާ ހަމައަށްތޯ، ޚާއްޞަކޮށް ދަރަނިވެރިޔާ ރަހުނު ވިއްކާލައިގެން ފައިސާ ހޯދުމަށް އެދިފައިވާއިރު.

ބައެއް ބަދަލުކުރި (ޖޫރިމަނާގެ ޢަދަދު ބާޠިލުކޮށް، ޖޫރިމަނާ ނަގާނީ ރަހުނު ވިއްކުމަށް އެދުނު ދުވަހާ ހަމައަށް ކަމަށް ކަނޑައަޅައި، ބާކީ ބައިތައް ޤާއިމް)

ރަހުނު ވިއްކާލުމަށް ދަރަނިވެރިޔާ އެދުމުން އެގޮތަށް ޢަމަލުކުރުމަށް އިސްކަން ދޭންޖެހޭތީ، އެ ދުވަހުން ފަހުން ޖޫރިމަނާ އަރަމުން ދިއުމަކީ ޢަދްލު އިންޞާފާ ޚިލާފު ނުޙައްޤު މަންފާއެއް ކަމުން، ޖޫރިމަނާ ނަގާނީ އެ ދުވަހާ ހަމައަށެވެ.