2017/HC-A/419

ފެމިލީ ކޯޓުން، ހުށަހެޅި ފަރާތް ނިޔާވެފައިވާތީ މައްސަލަ ކުރިއަށް ގެންދެވެން ނެތްކަމަށް ކަނޑައަޅައި ދަޢުވާ ފޯމް ބާޠިލުކުރިއެވެ.

ގޯއްޗެއްގެ 200 އަކަފޫޓު، ވަޞިއްޔަތްކުރި ފަރާތް ދުނިޔޭގައި ނެތް ދުވަހަކުން، އެ ފަރާތުގެ ދެ ބޭބެ/ކޮކޯ ދަރިންނަށް ހަމަހަމައަށް ވަޞިއްޔަތުން ދިނުމަށް ފެމިލީ ކޯޓަށް ހުށަހެޅިއެވެ. ވަޞިއްޔަތުން ލިބޭ ފަރާތްތަކުން ޤަބޫލުކުރާކަމަށް ބަޔާން ނެގުމަށްފަހު، މައްސަލަ ނިމުމުގެ ކުރިން ވަޞިއްޔަތުން ދޭން ހުށަހެޅި ފަރާތް ނިޔާވިއެވެ.

އިސްތިއުނާފުކުރި ފަރާތްތަކުން ބުނީ އީޖާބާއި ޤަބޫލު ޞައްޙަ ގޮތުގައި ހިނގާ ނިމުނު ނަމަވެސް ގިނަ މަސްތަކެއްވަންދެން ޙުކުމް ނުކުރުމާއި، އަޞްލަށް ނުބަލާ ދަޢުވާ ފޯމް ބާޠިލުކުރުމުގެ ސަބަބުން ޙައްޤުތައް ގެއްލިފައިވާކަމަށެވެ.

ވަޞިއްޔަތުން ދިނުމަށް ހުށަހެޅި މައްސަލައެއް ކޯޓުން ނިންމުމުގެ ކުރިން ހުށަހެޅި ފަރާތް މަރުވުމުން، އީޖާބާއި ޤަބޫލު ހިނގާފައިވާކަމަށް ބުނި ނަމަވެސް، ދަޢުވާ ފޯމް ބާޠިލުކުރުމަކީ ޞައްޙަ ނިންމުމެއްތޯ.

އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް

ވަޞިއްޔަތުގެ މައްސަލަތައް ޝަރީޢަތުން ނިންމަންޖެހޭ މައްސަލަތަކެއް ކަމުން އީޖާބާއި ޤަބޫލު އެކަނި ކާފީ ނުވާއިރު، ކޯޓުން ނިމުމުގެ ކުރިން ތަން ލިބިފައިވާކަމަށް ނުބެލެވޭނެއެވެ. ދަޢުވާކުރާ ފަރާތް މަރުވުމަކީ ދަޢުވާ ފޯމް ބާޠިލުކުރެވޭ ޙާލަތެއް ކަމުން ދަށުކޯޓުގެ ނިންމުމަކީ ޝަރުޢީ ނުވަތަ ޤާނޫނީ އުޞޫލަކާ ޚިލާފު ނިންމުމެއް ނޫނެވެ.