ައްބާސް ވާފިރު ވ. 1.އަޙްމަދު ޝިޔާމް

ސިވިލް ކޯޓުން ކަނޑައެޅީ ޕާޓީގެ ކައުންސިލުން އެހެން ގޮތެއް ކަނޑައަޅަންދެން ޕާޓީ ހިންގުމުގެ ޒިންމާ އުފުލަންޖެހޭނީ ޕާޓީގެ މުސްތަޝާރު ކަމުގައި ކަމަށާއި، 24 ގަޑިއިރުގެ ތެރޭގައި ކައުންސިލްގެ ރަސްމީ ޖަލްސާއެއް ބޭއްވުމަށް މުސްތަޝާރަށް އަމުރުކުރިއެވެ.

ޕާޓީގެ ރައީސް އަސާސީ ޤަވާޢިދާ ޚިލާފަށް ޕާޓީގެ ގުނަވަންތައް ސަސްޕެންޑްކޮށް، ކައުންސިލްގެ ރުހުމެއްނެތި މަޝްވަރާ މަޖިލިހެއް އުފައްދައި، ހިންގާ ޤަވާޢިދުގައިވާ ގޮތަށް ކައުންސިލްގެ ޖަލްސާތައް ނުބާއްވާކަމަށް ބުނެ، ޕީޕީއެމްގެ ދެ މެންބަރަކު ޕާޓީއާ ދެކޮޅަށް ސިވިލް ކޯޓަށް މައްސަލަ ހުށަހެޅިއެވެ.

އިސްތިއުނާފުކުރި މެންބަރު ބުނީ ރައީސް ޚިލާފުވީ ޤާނޫނުއަސާސީގެ އަދި ސިޔާސީ ޕާޓީތަކުގެ ޤާނޫނުގެ ކޮން މާއްދާއަކާކަން ދަޢުވާގައި ބުނެފައި ނުވާކަމަށެވެ. ތަދައްޚުލުވި ރައީސް ބުނީ ޙުކުމަކީ އަސާސީ ޤަވާޢިދާ ޚިލާފު، ދަޢުވާގައި ނުއެދޭ ފަރުވާއެއް ދީފައިވާ، ސުޕްރީމް ކޯޓުގެ ސަރކިއުލަރާ ޚިލާފު ނިންމުމެއްކަމަށެވެ. ޕީޕީއެމް ބުނީ ޙުކުމަށް ބަދަލު ގެންނަންޖެހޭ ސަބަބެއް ނުފެންނަ ކަމަށެވެ.

ސިޔާސީ ޕާޓީއެއްގެ ރައީސް ޕާޓީގެ ހިންގާ ޤަވާޢިދާ އެއްގޮތަށް ކައުންސިލްގެ ޖަލްސާތައް ނުބާއްވާ ހުރުމުން، ޕާޓީގެ މެންބަރުން ހުށަހެޅި މައްސަލައެއްގައި، ކައުންސިލުން އެހެން ގޮތެއް ކަނޑައަޅަންދެން ޕާޓީ ހިންގުން ޕާޓީގެ މުސްތަޝާރާ ޙަވާލުކޮށް ކައުންސިލްގެ ޖަލްސާއެއް ބޭއްވުމަށް ސިވިލް ކޯޓުން ކުރި ޙުކުމް ޝަރުޢީ އަދި ޤާނޫނީ އުޞޫލުތަކާ ޚިލާފުތޯ؛ އަދި ޕާޓީގެ މެންބަރަކަށް އެ ޙުކުމް އިސްތިއުނާފުކުރުމުގެ މަސްލަޙަތު އޮތްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަޢުވާއަކީ ޤާނޫނުއަސާސީ ނުވަތަ ސިޔާސީ ޕާޓީތަކުގެ ޤާނޫނާ ޚިލާފުވާކަމަށް ކުރި ދަޢުވާއެއް ނޫން، ޕާޓީގެ ޤަވާޢިދުތަކާ ޚިލާފުވުން ހުއްޓުވުމަށް ކުރި ދަޢުވާއެއްކަމާއި، ޕާޓީއަށް ދިފާޢު ހުށަހެޅުމަށް އެކަށީގެންވާ ފުރުޞަތު ދީފައިވާކަމާއި، ޤަވާޢިދުގައި ޙައްލެއް ނެތް ޚާއްސަ ޙާލަތެއްގައި ކޯޓަށް ވިރާސީގޮތުން ލިބިފައިވާ ބާރުން ދިން ފަރުވާއަކީ އެކަށީގެންވާ ފަރުވާއެއްކަމަށް ހައިކޯޓުން ކަނޑައެޅިއެވެ.