2017/HC-A/248

ކްރިމިނަލް ކޯޓުން، ހެކި ނައްތާލައި ހެކިންނަށް ނުފޫޒު ފޯރުވާފާނެތީއާއި މުޖްތަމަޢުގެ ސަލާމަތާއި ރައްކާތެރިކަމަށްޓަކައި ހައްޔަރުކުރުމަށް އަމުރުކުރިއެވެ.

އެއް މީހަކު ފާރަލަމުން ގޮސް ގެއެއްގެ ތެރޭގައި ތޫނު ހަތިޔާރުން ޙަމަލާދީ މަރާލި މައްސަލައިގައި ބައިވެރިވިކަމަށް ތުހުމަތުކުރެވޭ މީހަކު ހައްޔަރުކުރުމަށް ފުލުހުން ކްރިމިނަލް ކޯޓަށް އެދުނެވެ.

އިސްތިއުނާފުކުރި ފަރާތުން ބުނީ ޤާނޫނުއަސާސީގެ 46 ވަނަ މާއްދާއިން ހައްޔަރުކުރުމުގެ ބާރު ލިބިދީފައިވަނީ އެކަށީގެންވާ ސަބަބުތަކެއް ނުވަތަ ހެކިތަކެއް ހުރެގެން ކަމަށާއި، ހާދިސާ ހިނގާތާ އެތައް ދުވަހެއް ފަހުން ފުލުހުން ހުށަހެޅި ކަންކަމަކީ އެފަދަ ސަބަބުތަކެއް ނޫން ކަމަށެވެ.

ޤަސްދުގައި މީހަކު މެރުމުގެ ތުހުމަތުގައި ހައްޔަރުކުރުމަށް ކްރިމިނަލް ކޯޓުން ނެރުނު އަމުރަކީ، ހާދިސާ ހިނގާތާ ދުވަސްތަކަކަށްފަހު ހުށަހެޅުނު ސަބަބުތަކުގެ މައްޗަށް ނެރުނު، ޤާނޫނުއަސާސީގެ 46 ވަނަ މާއްދާއާ ޚިލާފު އަމުރެއްތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް

ފުލުހުންގެ އިންޓެލިޖެންސް މަޢުލޫމާތާއި ސީ.ސީ.ޓީ.ވީ ފޫޓޭޖުން ހެކި ޤަރީނާ ލިބިފައިވާއިރު، މަރު ހިމެނޭ އަނިޔާވެރި ޢަމަލެއްގެ މައްސަލައިގައި ކޯޓު އަމުރެއްގެ ދަށުން ހައްޔަރުކުރެވިފައިވަނީ ޤާނޫނުއަސާސީގެ 46 ވަނަ މާއްދާގެ ރޫހާ އެއްގޮތަށް ކަމަށް ނިންމިއެވެ.