2016/HC-A/445

ކްރިމިނަލް ކޯޓުން، ހެކިންގެ ހެކިބަހާއި ޤަރީނާއިން ކުށް ސާބިތުވާކަމަށް ކަނޑައަޅައި، ދެ ތުހުމަތުކުރެވޭ ފަރާތް އުމުރަށް ޖަލަށްލުމާއެކު 100,000 ރުފިޔާގެ ޖޫރިމަނާއަށް ޙުކުމްކޮށް، ފެނުނު ފައިސާ ދައުލަތަށް ނެގުމަށް އަމުރުކުރިއެވެ.

ފުލުހުންގެ އިންޓެލިޖެންސް މަޢުލޫމާތަކާ ގުޅިގެން ހިންގި އޮޕަރޭޝަނެއްގައި، އިސްތިއުނާފުކުރި ފަރާތުން އަނެއް ތުހުމަތުކުރެވޭ ފަރާތާ ކޮތަޅެއް ޙަވާލުކުރިކަމަށާއި، އެ ކޮތަޅުގެ ތެރެއިން ފެނުނު 4 ފިލްމު ދަޅުގައި 126.6282 ގްރާމް ކެނަބިސް ހުރިކަމަށް ބުނެ ކެނަބިސް ޓްރެފިކްކުރުމުގެ ދަޢުވާ އުފުލިއެވެ. ގެއިން ފެނުނު ފައިސާ ދައުލަތަށް ނެގުމަށްވެސް އެދުނެވެ.

އިސްތިއުނާފުކުރި ފަރާތުން ބުނީ، ހައްޔަރުކުރެވޭ ފުރުޞަތު އޮއްވާ ހައްޔަރު ނުކޮށް ފަހުން ގެއިން ހައްޔަރުކުރިކަމަށާއި، މަގުމަތިން ފެނުނު ކޮތަޅުގައި އޭނާގެ ފިންގަރޕްރިންޓެއް ނެތްކަމަށާއި، ހައްޔަރުކުރުމުގައި ފުލުހުންގެ ޤާނޫނާ ޚިލާފުވެފައިވާކަމަށާއި، ކޮޓަރިން ފެނުނު ފައިސާއަކީ އެހެން ގޮތަކުން ހޯދި ފައިސާކަމަށެވެ.

ކެނަބިސް ޓްރެފިކްކުރުމުގެ ކުށުގެ ދަޢުވާގައި، ތުހުމަތުކުރެވޭ ފަރާތުން އަނެއް ތުހުމަތުކުރެވޭ ފަރާތާ ޙަވާލުކުރިކަމަށް ބުނާ ކޮތަޅާއި އޭގެ ތެރެއިން ފެނުނު މަސްތުވާތަކެއްޗާއި ތުހުމަތުކުރެވޭ ފަރާތާ ގުޅުވާލެވޭ މިންވަރަށް ހެކި ލިބިފައިވޭތޯ، އަދި ޗެއިން އޮފް ކަސްޓަޑީ ފުރިހަމަނުވުމުން ދަޢުވާ ސާބިތުވުމަށް ކުރާ އަސަރު.

ދަށުކޯޓުގެ ޙުކުމް ބާޠިލު (އިސްތިއުނާފުކުރި ފަރާތުގެ މައްޗަށް ކުރި ބައި)

ކޮތަޅަކީ އަނެއް ތުހުމަތުކުރެވޭ ފަރާތު ވައްޓާލި ކޮތަޅެއްކަމުގެ ހަރުދަނާ ހެކިބަހެއް ނެތުމާއި ޗެއިން އޮފް ކަސްޓަޑީ ފުރިހަމަނުވުމުން އެ ފަރާތުގެ ޙުކުމް 2016/HC-A/451 އިން ބާޠިލުކޮށްފައިވާތީ، އެ ކޮތަޅާ ގުޅުވައިގެން އިސްތިއުނާފުކުރި ފަރާތުގެ މައްޗަށް ކުޅަ ދަޢުވާވެސް ސާބިތުނުވާކަމަށް ކަނޑައެޅުނެވެ.