ސައިޓޭޝަން ކޮޕީ ކުރުމަށް
2016/HC-A/31
2016/HC-A/31، 2016/HC-A/31
2016/HC-A/31 (2016/HC-A/31, High Court of the Maldives, 24 July 2017)
2016/HC-A/31
މައްސަލައިގެ ޚުލާޞާ
ކުންފުނީގެ އަސާސީ ޤަވާއިދުގެ 81 ވަނަ މާއްދާގައި މިފަދަ ޚިލާފުތައް އާބިޓްރޭޝަނަށް ހުށަހަޅަންޖެހޭނެކަމަށް ބަޔާންވެފައިވާތީ، އެއިޖުރާއާތު ފުރިހަމަކުރުމަށްފަހު މެނުވީ ޝަރީޢަތުން ގޮތެއް ކަނޑައެޅެން ނެތްކަމަށް ސިވިލް ކޯޓުން ޙުކުމްކުރިއެވެ.
ކުންފުނީގެ ހިސާބު ހެދުމެއްނެތި އަދި ވެލިއޭޝަނެއް ނުހަދާ، ކުންފުނީގެ އެސެޓްތަކާއި ރިސޯޓުގެ ލީސްހޯލްޑް ރައިޓްސް ވިއްކާލުމަށް މެޖޯރިޓީ ޙިއްޞާދާރުން މަސައްކަތްކުރާތީ، ޙިއްޞާދާރެއްގެ އަދި ލޯނަށް ގެރެންޓީދީފައިވާ މީހެއްގެ ޙައިޘިއްޔަތުން، ކުންފުނީގެ ޤާނޫނުގެ 73 ވަނަ މާއްދާގެ ދަށުން ކޯޓު އަމުރަކަށް އެދި ޙިއްޞާދާރަކު ކުންފުނީގެ މައްޗަށް ދަޢުވާކުރިއެވެ. އެހެން ކުންފުންޏެއް ތަދައްޚުލުވިއެވެ.
ދަށުކޯޓުގެ ނިންމުމަކީ އާބިޓްރޭޝަން ޤާނޫނުގެ 15 ވަނަ މާއްދާއާއި، ސިވިލް ކޯޓުގެ އިޖުރާއީ ނުކުތާގެ ޤަވާޢިދުގެ 2 އަދި 4 ވަނަ މާއްދާއާއި، ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފު ނިންމުމެއްކަމަށް އިސްތިއުނާފުކުރި ފަރާތުން ބުނެއެވެ. އިޖުރާއީ ނުކުތާ ނެގީ ފަހުން އައި އިޖުރާއީ ކަމަކާ ގުޅިގެންކަމަށް ކުންފުނިން ބުނެއެވެ.
މައިގަނޑު ސުވާލު
ކުންފުނީގެ ހިންގާ ޤަވާޢިދުގައި ޙިއްޞާދާރުންނާއި ކުންފުންޏާ ދެމެދު ޖެހޭ މައްސަލަތައް އާބިޓްރޭޝަނަށް ހުށަހަޅަންޖެހޭނެކަމަށް ބަޔާންވެފައިވާއިރު، އެއިޖުރާއާތު ފުރިހަމަނުކޮށް ޙިއްޞާދާރަކު ކުންފުނީގެ މައްޗަށް ސިވިލް ކޯޓަށް ހުށަހެޅި ދަޢުވާ ބަލައިނުގަތުމަކީ ޞައްޙަ ނިންމުމެއްތޯ؛ އަދި އާބިޓްރޭޝަން ޤާނޫނުގެ 15 ވަނަ މާއްދާ ތަޠުބީޤުވާތޯއާއި، އިޖުރާއީ ނުކުތާ ނެގުނީ ސިވިލް ކޯޓުގެ ޤަވާޢިދާ ޚިލާފަށްތޯ.
ނިންމި ގޮތް
އިސްތިއުނާފު ބަލައިނުގަނެ، ދަށުކޯޓުގެ ޙުކުމް ޤާއިމް
ޙިއްޞާދާރު ސޮއިކޮށްފައިވާ ހިންގާ ޤަވާޢިދުގައި އާބިޓްރޭޝަނަށް ހުށަހަޅަންޖެހޭކަން ބަޔާންވެފައިވާތީ އަދި ކުންފުނިން ލުޔެއް ދީފައިނުވާތީ، އެއިޖުރާއާތު ފުރިހަމަނުކޮށް ކޯޓަށް ނުދެވޭނެއެވެ. އާބިޓްރޭޝަން ހިންގާ ތަނެއް ކަނޑައަޅާފައިނުވާތީ ޤާނޫނު ނަންބަރު 10/2013 (އާބިޓްރޭޝަން ޤާނޫނު) ގެ 15 ވަނަ މާއްދާ ތަޠުބީޤު ނުވެއެވެ. އިޖުރާއީ ނުކުތާ ނެގީ ޤަވާޢިދުގެ 2 (ރ) އާ އެއްގޮތަށެވެ.
ކަނޑައެޅުނު އުޞޫލުތައް
- މައްސަލައާ ގުޅިގެން ވާހަކަދެކެވޭ މުޅި މައުޟޫޢުގެ މައްޗަށް ބަލާއިރު ތަދައްޚުލުވުމުގެ މަޞްލަޙަތެއް އޮތްކަމަށް ބެލެވޭ ފަރާތަކަށް ދަށުކޯޓުގައި ތަދައްޚުލުވުމުގެ ފުރުސަތު ދެވުނު ފަދައިން، އެފުރުސަތު ހައިކޯޓުގައިވެސް ދެވިފައިވާނެއެވެ. (ޙުކުމްގެ ޕެރެގްރާފް ނަންބަރު 3 (ހ))
- ޤާނޫނު ނަންބަރު 10/96 (ދިވެހިރާއްޖޭގެ ކުންފުންޏާއިބެހޭ ޤާނޫނު) ގެ 15 ވަނަ މާއްދާގެ (ށ) ގެ ދަށުން ކުންފުނީގެ ހިންގާ ޤަވާޢިދަށް ޢަމަލުކުރުމަކީ ކޮންމެ މެންބަރެއްގެ މައްޗަށް ލާޒިމްވެގެންވާ ކަމަކަށްވާއިރު، ކުންފުންޏާއި ކުންފުނީގެ ޙިއްސާދާރުންގެ މެދުގައި މައްސަލައެއް ޖެހިއްޖެނަމަ އެމައްސަލައެއް ޙައްލުކުރަންޖެހޭނީ އާބިޓްރޭޝަން މެދުވެރިކޮށްކަމުގައި ޙިއްސާދާރެއްގެ ޙައިސިއްޔަތުން ސޮއިކޮށްފައިވާ ހިންގާ ޤަވާޢިދުގައި ބަޔާންވެފައިވާނަމަ، ހިންގާ ޤަވާޢިދުގައިވާ އެއިޖުރާއާތާއި އެއްގޮތަށް ޢަމަލުކުރުމަކީ އެ ޙިއްސާދާރު ރުހި އެއްބަސްވެފައިވާ ގޮތެއް ކަމުން، އެމާއްދާއަށް ޢަމަލުކުރުމަށް ކުންފުނިން ލުޔެއް ދީފައިވާކަން އެނގެން ނެތްނަމަ، އެ އިޖުރާއާތުތައް ފުރިހަމަނުކޮށް މައްސަލަ ޝަރީޢަތަށް ހުށަހެޅިދާނެކަމަށް ބެލެވެން ނެތެވެ. (ޙުކުމްގެ ޕެރެގްރާފް ނަންބަރު 3 (ށ))
- ޤާނޫނު ނަންބަރު 10/2013 (އާބިޓްރޭޝަން ޤާނޫނު) ގެ 4 ވަނަ މާއްދާގައި، އެޤާނޫނުގައި އެހެން ގޮތަކަށް ކަނޑައަޅާފައިނުވާހާ ހިނދަކު، އެ ޤާނޫނުގައި ބަޔާންކޮށްފައިވާ އުޞޫލުތައް ހިނގާނީ އާބިޓްރޭޝަނުގެ އެއްބަސްވުމެއްގެ ދަށުން އާބިޓްރޭޝަން ހިންގާތަނަކީ ދިވެހިރާއްޖެ ކަމުގައި ކަނޑައަޅާފައިވާ ޙާލަތްތަކުގައިކަމަށް ބަޔާންވެފައިވާއިރު، ހިންގާ ޤަވާޢިދުގައި އާބިޓްރޭޝަން ހިންގާތަނެއް ކަނޑައަޅާފައިނެތް ޙާލަތަކީ އާބިޓްރޭޝަން ޤާނޫނުގެ 15 ވަނަ މާއްދާގައިވާ އުޞޫލުތައް ތަޠުބީޤުކުރެވެން އޮތް ޙާލަތެއް ނޫނެވެ. (ޙުކުމްގެ ޕެރެގްރާފް ނަންބަރު 3 (ނ))
- ސިވިލް ކޯޓުގެ ޝަރީޢަތުގެ އިޖުރާއީ ނުކުތާއާއި ބެހޭ ޤަވާޢިދުގެ 2 ވަނަ މާއްދާގެ (ރ) ގައި ބުނާގޮތުން، މައްސަލައިގެ ފުރަތަމަ އަޑުއެހުމުގައި ނުވަތަ އެއާއި ވިދިގެން އަންނަ އަޑުއެހުމުގައި އިޖުރާއީ ނުކުތާއެއް ނަގައިފައިނެތްނަމަވެސް، ފަހުން އަންނަ އިޖުރާއީ ކަމަކާއި ގުޅިގެން އެކަމަކާއިގުޅޭ ގޮތުން އިޖުރާއީ ނުކުތާއެއް ނެގިދާނެއެވެ. (ޙުކުމްގެ ޕެރެގްރާފް ނަންބަރު 3 (ރ))
- ޤާނޫނު ނަންބަރު 10/96 (ދިވެހިރާއްޖޭގެ ކުންފުންޏާއިބެހޭ ޤާނޫނު) ގެ 15 ވަނަ މާއްދާގެ (ށ)
- ޤާނޫނު ނަންބަރު 10/96 (ދިވެހިރާއްޖޭގެ ކުންފުންޏާއިބެހޭ ޤާނޫނު) ގެ 73 ވަނަ މާއްދާގެ (ށ) ގެ (1) އަދި (2)
- ޤާނޫނު ނަންބަރު 10/2013 (އާބިޓްރޭޝަން ޤާނޫނު) ގެ 4 ވަނަ މާއްދާ
- ޤާނޫނު ނަންބަރު 10/2013 (އާބިޓްރޭޝަން ޤާނޫނު) ގެ 15، 40 އަދި 43 ވަނަ މާއްދާ
- ސިވިލް ކޯޓުގެ ޝަރީޢަތުގެ އިޖުރާއީ ނުކުތާއާއި ބެހޭ ޤަވާޢިދުގެ 2 ވަނަ މާއްދާގެ (ރ)
- ސިވިލް ކޯޓުގެ ޝަރީޢަތުގެ އިޖުރާއީ ނުކުތާއާއި ބެހޭ ޤަވާޢިދުގެ 4 ވަނަ މާއްދާ (އިސްތިއުނާފުގެ ނުކުތާގައި)
- ޤާނޫނު ނަންބަރު 4/91 (ދިވެހިރާއްޖޭގެ ކޮންޓްރެކްޓާބެހޭ ޤާނޫނު) ގެ 20 ވަނަ މާއްދާ (އިސްތިއުނާފުގެ ނުކުތާގައި)
- ބެންޗު
- ޢަލީ ސަމީރު، ޢަބްދުﷲ ޙަމީދު، ޢަބްދުއްރައޫފު އިބްރާހީމް
- ޚިލާފު ރައުޔު
- ނެތް