2015/HC-A/82

ސިވިލް ކޯޓުން، އިންވޮއިސްތަކާއި ޑެލިވަރީ ސްލިޕްތަކާއި ޗެކްތަކާއި ހެކިބަހުން ދަޢުވާ ސާބިތުވާކަމަށް ކަނޑައަޅައި، ދަޢުވާގައި އެދުނު ފައިސާ 3 މަސްދުވަހުގެ ތެރޭގައި ދެއްކުމަށް ޙުކުމްކުރި.

ކުންފުންޏަކުން އިސްތިއުނާފުކުރި ފަރާތުގެ ނަމުގައި ރަޖިސްޓްރީކޮށްފައިވާ ލޯކަލް އިންވެސްޓްމަންޓަކަށް ތަފާތު ފަހަރުމަތިން ކްރެޑިޓަށް މުދާ ދޫކޮށް، އެ މުދަލުގެ އަގާއި ގެއްލުމުގެ ބަދަލު ހޯދުމަށް ދަޢުވާކުރި މައްސަލައެކެވެ.

އިސްތިއުނާފުކުރި ފަރާތުން ބުނީ ކޮންޓްރެކްޓާބެހޭ ޤާނޫނުގެ 2، 5، 6، 7 އަދި 8 ވަނަ މާއްދާތަކާ ޚިލާފަށް، ލިޔުމުން އެއްބަސްވުމެއް ނުވަތަ ހުށަހެޅުމާއި ޤަބޫލުކުރުމެއް ނެތި ޢަޤްދެއް ސާބިތުވާކަމަށް ކަނޑައަޅާފައިވާ ކަމަށެވެ.

ލިޔުމުން ވެފައިވާ އެއްބަސްވުމެއް ނެތި، އިސްތިއުނާފުކުރި ފަރާތުގެ ނަމުގައި ރަޖިސްޓްރީކޮށްފައިވާ ލޯކަލް އިންވެސްޓްމަންޓަށް ކްރެޑިޓަށް ދޫކުރި މުދަލުގެ އަގު ދެއްކުމަށް އޭނާއަށް ޒިންމާވާ ޞައްޙަ ޢަޤްދެއް ހުށަހެޅުމާއި ޤަބޫލުކުރުމުގެ އުޞޫލުން ސާބިތުވޭތޯ؛ އަދި ކޯޓަށް ޙާޟިރުނުވާ އިސްތިއުނާފުކުރި ފަރާތުގެ ޣައިރު ޙާޟިރުގައި ޙުކުމްކުރެވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް (އިސްތިއުނާފުކުރި ފަރާތުގެ ޣައިރު ޙާޟިރުގައި)

މުދާ ދޫކޮށްފައިވަނީ އިސްތިއުނާފުކުރި ފަރާތުގެ އެދުމުގެ މަތިން، އޭނާ ބުނާ ތަނަކަށް ކަމާއި، ޗެކްތައް ދީފައިވަނީ އެ މުދަލުގެ އަގު ދެއްކުމަށްކަމާއި، ފައިސާ ދައްކާނެކަމަށް އޭނާގެ ސޮއިގައި ސިޓީއެއް ފޮނުވާފައިވާކަން ހެކިން ސާބިތުވާތީ، ހުށަހެޅުމާއި ޤަބޫލުކުރުމާއި ޞައްޙަ ޢަޤްދެއް ސާބިތުވާކަމަށް ކަނޑައަޅައި ދަށުކޯޓުގެ ޙުކުމް ޤާއިމުކުރި.