2015/HC-A/266

އެއްބަސްވުމަކީ ކޮންޓްރެކްޓާބެހޭ ޤާނޫނުގެ 12 އާއި 13 ގެ ދަށުން ބާޠިލް ކޮންޓްރެކްޓެއް ކަމަށާއި، ނިމިފައިވާ މަސައްކަތަކީ 60.53% ކަމަށް ބަލާއިރު ދައްކާފައިވާ ފައިސާ އިތުރުކަމަށާއި، މަސައްކަތް ހުއްޓާލީ ކޮންޓްރެކްޓަރު އަމިއްލައަށް ކަމުން ގެއްލުމުގެ ބަދަލު ނުނެގޭނެކަމަށް ސިވިލް ކޯޓުން ޙުކުމްކުރިއެވެ.

ރިސޯޓެއް ތަރައްޤީކުރުމަށް ޓާރންކީ އުޞޫލުން ވެވުނު އެއްބަސްވުމެއްގެ ދަށުން މަސައްކަތްކުރަމުން އައި ރާއްޖޭގައި ރަޖިސްޓްރީ ނުކޮށްފައިވާ ބިދޭސީ ކުންފުންޏަކުން، އިންވޮއިސްތަކަށް ފައިސާ ނުދައްކާތީ މަސައްކަތް ހުއްޓާލިކަމަށް ބުނެ، ކުރި މަސައްކަތުގެ އަގާއި، ތަކެތީގެ އަގާއި، ގެއްލުމުގެ ބަދަލު ހޯދުމަށް ދަޢުވާކުރިއެވެ.

ކޮންޓްރެކްޓަރުން ބުނީ ކޮންޓްރެކްޓް ބާޠިލުކުރުމަކީ ރަނގަޅު ނިންމުމެއް ނޫންކަމަށާއި، އެއްބަސްވުމުގެ 5.5 (3) އާއި 7.4 އަށް ރިޢާޔަތް ނުކޮށް ކަމަށާއި، އަނެއް ފަރާތުގެ އެސެސްމެންޓް ރިޕޯޓަށް އެކަނި ރިޢާޔަތްކުރި ކަމަށާއި، ކޮންޓްރެކްޓާބެހޭ ޤާނޫނުގެ 23 ވަނަ މާއްދާގެ ދަށުން ގެއްލުމުގެ ބަދަލު ލިބިދޭންޖެހޭ ކަމަށެވެ.

ދިވެހިރާއްޖޭގައި ރަޖިސްޓްރީ ނުކޮށް ބިދޭސީ ކުންފުންޏަކާ ވެވުނު ރިސޯޓް ތަރައްޤީކުރުމުގެ ޓާރންކީ އެއްބަސްވުމަކީ ބާޠިލް އެއްބަސްވުމެއްތޯ؛ ކޮންޓްރެކްޓަރަށް މަސައްކަތް ހުއްޓާލުމުގެ ޙައްޤު ލިބިފައިވޭތޯ؛ ނިންމި މަސައްކަތުގެ މިންވަރު ކަނޑައެޅުނު ގޮތާއި ގެއްލުމުގެ ބަދަލު ނަގައިދެވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ރަޖިސްޓްރީ ނުކޮށް ރާއްޖޭގައި ވިޔަފާރި ނުކުރެވޭނެތީ އަދި އެކަން އަނެއް ފަރާތަށް އަންގާފައި ނުވާތީ ކޮންޓްރެކްޓް ބާޠިލުކުރުން ޞައްޙަ ކަމަށާއި، ޕްރޮޖެކްޓް މެނޭޖަރާއި ކޮންސަލްޓެންޓް ސޮއި ނުކޮށްވާ އިންވޮއިސްތަކުގެ ސަބަބުން މަސައްކަތް ހުއްޓާލުމުގެ ޙައްޤު ނުލިބޭ ކަމަށާއި، މަސައްކަތުގެ މިންވަރު ކަނޑައެޅީ ހުށަހެޅުނު ލިޔުންތަކަށް ރިޢާޔަތްކޮށް ކަމަށާއި، މަސައްކަތް ހުއްޓާލީ އަމިއްލައަށް ކަމުން ބަދަލު ނުނެގޭ ކަމަށް ބަލައި ޙުކުމް ޤާއިމްކުރިއެވެ.