2016/HC-A/56

1456/Cv-C/2012 ގެ ޙުކުމަށް ރިޢާޔަތްކޮށް، ދެފަރާތުގެ މެދުގައި ސަރުކާރުގެ މައްޗަށް ޤާނޫނީ ގޮތުން ލާޒިމުވާ އެއްބަސްވުމެއް ސާބިތުވާކަމަށް ކަނޑައަޅައި، އެއްބަސްވުން ތަންފީޛުކޮށް ފަތުރުވެރިކަމުގެ ދާއިރާއާ ގުޅުންހުރި މަސައްކަތްތައް ކުރަން ހުށަހަޅާ ހުށަހެޅުންތަކާ ގުޅޭގޮތުން ޢަމަލުކުރާނެ އުޞޫލުގެ 8 ވަނަ މާއްދާގައިވާ އެއްބަސްވުންތަކުގައި ސޮއިކުރުމަށް ސިވިލް ކޯޓުން ސަރުކާރަށް ޙުކުމްކުރިއެވެ.

ސީއެސްއާރު މަޝްރޫޢާއެކު އދ. ފުށިދިއްގާ (ރަތްދިއްގާ) ރިސޯޓަކަށް ތަރައްޤީކުރުމަށް ހުށަހެޅި ހުށަހެޅުން ސަރުކާރުން ޤަބޫލުކުރިކަން 08 ޑިސެމްބަރު 2011 ގެ ސިޓީއަކުން ފިނޭންސް މިނިސްޓްރީން އަންގައި ޑްރާފްޓް އެގްރީމެންޓެއް ފޮނުވިއެވެ. ދެން ސީއެސްއާރު ހުށަހެޅުންތަކަށް ބަދަލު އައިސްފައިވާކަން އަންގައި މަޝްވަރާ ކުރިއަށްދިޔަ ނަމަވެސް އެގްރީމެންޓުގައި ސޮއިނުކުރެވުމުން، އެއްބަސްވުމަށް ޢަމަލުކުރުމަށް އަމުރުކުރުމަށް އެދި ހުށަހެޅި ފަރާތުން ދަޢުވާކުރިއެވެ. މި ރަށް ދެން އެހެން ކުންފުންޏަކަށް އެމްއެމްޕީއާރުސީން ކުއްޔަށް ދިނުމަށް ނިންމި ކަމުން، އެ ކުންފުނި އިސްތިއުނާފުގައި ތަދައްޚުލްވިއެވެ.

ދައުލަތުން ބުނީ ހައިކޯޓުގެ ސާބިޤާތަކަށް ރިޢާޔަތްނުކޮށް، ދައުލަތުގެ ހެކި ބަލައިނުގެން، ސީއެސްއާރު އެއްބަސްވުމުގެ ޝަރުޠުތައް ފުރިހަމަނުވެ ދައުލަތަށް އެއްބަސްވުންތަކުގައި ސޮއިކުރުން ލާޒިމުކޮށް، ޓެންޑަރ މައްސަލަތަކުގެ ސާބިޤާތައް ނުބައިކޮށް ތަޠްބީޤުކުރިކަމަށެވެ.

ސީއެސްއާރު މަޝްރޫޢާއެކު ރަށެއް ރިސޯޓަކަށް ތަރައްޤީކުރުމަށް ހުށަހެޅި ހުށަހެޅުން ސަރުކާރުން ޤަބޫލުކުރިކަން އަންގައި ޑްރާފްޓް އެގްރީމެންޓެއް ފޮނުވުމުން، ސޮއިނުކުރެވި ހުރި އެ އެއްބަސްވުމަކީ ޓޫރިޒަމާބެހޭ ޤާނޫނުގެ ދަށުން ދައުލަތުގެ މައްޗަށް ޢަމަލުކުރުން ލާޒިމު އެއްބަސްވުމެއްތޯއާއި، އެ އެގްރީމެންޓާ އެއްގޮތަށް ޢަމަލުކުރުމަށް ދައުލަތަށް އަމުރުކުރެވޭނެތޯ؛ އަދި އިސްތިއުނާފީ މަރުޙަލާގައި ތިންވަނަ ފަރާތަކަށް ތަދައްޚުލްވުމުގެ ހުއްދަ ދިނުން.

ދަށުކޯޓުގެ ޙުކުމް ބާޠިލު

ޓޫރިޒަމާބެހޭ ޤާނޫނުގެ ދަށުން ރިސޯޓު ތަރައްޤީކުރުމުގެ ބަނދެވޭ އެއްބަސްވުމެއް އުފެދޭނީ ލިޔުމުން ވެވޭ އެއްބަސްވުމަކުން ކަމާއި، 08 ޑިސެމްބަރު 2011 ގެ ސިޓީއަށްފަހުވެސް މަޝްވަރާ ކުރިއަށްދިޔަ ކަމާއި ސޮއިކުރެވިފައި ނުވާ ކަމުން އެފަދަ އެއްބަސްވުމެއް ނެތެވެ. އެހެންކަމުން ޑްރާފްޓް އެގްރީމެންޓާ އެއްގޮތަށް ޢަމަލުކުރުމަށް ސަރުކާރަށް ލާޒިމުކުރާނެ ހަމައެއް ނެތެވެ.