2015/HC-A/152

ސިވިލް ކޯޓުން ކުރީގެ ދެ ޙުކުމަށް ބަދަލެއް އައިސްފައިނުވާތީއާއި ކުރީގެ ޙުކުމެއްގެ ނަތީޖާއަށް ބަދަލު އަންނަފަދަ ނިޔާއެއް ދަށުކޯޓަކަށް އިއްވޭނެ ކަމެއް ނޫންކަމަށް ކަނޑައަޅައި، ދަޢުވާ ބަލައި ކުރިއަށް ގެންދެވޭނެ ތަނެއް ނެތްކަމަށް ޙުކުމްކުރިއެވެ.

މަރުޙޫމަކު ދުނިޔޭގައި ހުރިއިރު ގޯތިއެއްގެ އޭނާގެ ބައި އިސްތިއުނާފުކުރި ފަރާތަށް ދޭން ބުނެފައިވާތީ އެ ބައި ލިބިދިނުމަށް އެދި ސިވިލް ކޯޓަށް ދަޢުވާކުރިއެވެ. މީގެ ކުރިން ހުށަހެޅި ދަޢުވާއެއްގައި އެ ގޯތީގައި އޭނާގެ ޙައްޤެއް ނެތްކަމަށާއި، އެހެން ޤަޟިއްޔާއެއްގައި މަރުޙޫމުގެ ބައި ދައުލަތަށް ލިބިގެންވާކަމަށް ޙުކުމްކޮށްފައިވިއެވެ.

އިސްތިއުނާފުކުރި ފަރާތުން ބުނީ ހެކިބަސް ނަގައިފައި ވަނިކޮށް ކުރީގެ ޙުކުމަށް ރިޢާޔަތްކޮށް މައްސަލަ ނިންމުމަކީ ޤާނޫނުއަސާސީގެ 40 ވަނަ މާއްދާއާ ޚިލާފު ކަމަށާއި، ވަޞިއްޔަތާއި ގޯތީގައި ދިރިއުޅުނު ގޮތަށް ދަށުކޯޓުން ނުބަލާ ކަމަށެވެ. ދައުލަތުން ދަޢުވާކުރުމުގެ ޙައްޤު ނެތްކަމަށް އިޖުރާއީ ނުކުތާ ހުށަހެޅިއެވެ.

ގޯތިއެއްގައި ޙައްޤެއް ނެތްކަމަށް ކުރިން ކޯޓުން ކަނޑައަޅައި ޙުކުމްކޮށް، އެ ޙުކުމްތަކަށް ބަދަލެއް އައިސްފައިނުވާ ޙާލަތުގައި، އެ ގޯތީގެ ބައެއް ވަޞިއްޔަތުން ލިބިދިނުމަށް ކުރާ ދަޢުވާއެއް ދަށުކޯޓަށް ބަލައި ކުރިއަށް ގެންދެވޭނެތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުރީގެ ޙުކުމަށް ހައިކޯޓުން ތާއިދުކޮށް ސުޕްރީމް ކޯޓުން ބަދަލު ނުގެނެސް ޞައްޙަކަން މަތީ ދެމިއޮންނާތީއާއި، ދައުލަތަށް ލިބިގެންވާކަމަށް ކުރި ޙުކުމަށްވެސް ބަދަލު ނައިސްފައިވާތީ ދަށުކޯޓުގެ ޙުކުމަށް ބަދަލު ގެންނަންޖެހޭ ސަބަބެއް ނެތެވެ.