2014/HC-A/101

ކޮޅުމަޑުލު ވޭމަންޑޫ މެޖިސްޓްރޭޓް ކޯޓުން ކަނޑައެޅީ މުސާރަ ހިފެހެއްޓުމުގެ ބާރު ކައުންސިލަށް ލިބިދީފައި ނުވާކަމަށާއި، ހިފެހެއްޓި އެންމެހާ މުސާރައާއި ޢިނާޔަތްތައް ދިނުމަށެވެ.

ކައުންސިލުގެ ޖަލްސާތަކަށް ވިދިވިދިގެން 7 ފަހަރު ޙާޟިރުނުވާތީ ކައުންސިލަރު މެމްބަރުކަމުން ވަކިކުރުމަށް ކައުންސިލުން ފާސްކޮށް، ޖިނާއީ ތުހުމަތެއްގައި ބަންދުކުރެވުމާ ގުޅިގެން 2012 ނޮވެމްބަރު 20 އިން ފެށިގެން މުސާރަ ހިފެހެއްޓިއެވެ. އިލެކްޝަންސް ކޮމިޝަނުން ނިންމީ ކައުންސިލަރު ވަކިވެފައިވާކަމަށް ބެލެވޭނެ ޝަރުޢީ އަދި ޤާނޫނީ ހަމައެއް ނެތްކަމަށެވެ.

ކައުންސިލުގެ ފަރާތުން ބުނީ ލާމަރުކަޒީ ޤާނޫނުގެ 119 ވަނަ މާއްދާގެ ދަށުން 7 ޖަލްސާއަށް ޙާޟިރުނުވާ މެންބަރުގެ މަޤާމު ގެއްލޭތީ އެކަމަށް ދަށުކޯޓުން ރިޢާޔަތްނުކުރާކަމަށާއި، ހައިކޯޓުގެ SH/19-I-2011/HC ޤަޟިއްޔާގެ އުޞޫލާއި ޝަރުޢީ އުޞޫލުތަކާއި އިކުއިޓީގެ މަބާދީތަކާ ޚިލާފުކަމަށެވެ.

ކައުންސިލުގެ ޖަލްސާތަކަށް ޙާޟިރުނުވާތީ ކައުންސިލުން މެމްބަރުކަމުން ވަކިވެއްޖެކަމަށް ބެލި ނަމަވެސް، އިލެކްޝަންސް ކޮމިޝަނުން އެކަން ކަށަވަރުނުކޮށް ވަކިވާނެ ޤާނޫނީ ހަމައެއް ނެތްކަމަށް ނިންމާފައިވާއިރު، ކައުންސިލަރުގެ މުސާރައާއި ޢިނާޔަތްތައް ހިފެހެއްޓުމުގެ ބާރު އަތޮޅު ކައުންސިލަށް ލިބިގެންވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ވަޒީފާގައި ދެމިހުރިހާ ހިނދަކު އުޖޫރަ ޙައްޤުވާނެތީއާއި، ލާމަރުކަޒީ ޤާނޫނުގެ 149 ވަނަ މާއްދާގެ ބާރުން ލޯކަލް ގަވަރމަންޓް އޮތޯރިޓީން ނެރުނު ސަރކިއުލަރގެ (ށ) ގެ ދަށުން، އިލެކްޝަންސް ކޮމިޝަނުން ވަކިވާނެ ހަމައެއް ނެތްކަމަށް ނިންމި ނިންމުން ކޯޓަކުން ބާޠިލްނުކުރާހާ ހިނދަކު މުސާރަ ދޭންޖެހޭތީ، މުސާރަ ހިފެހެއްޓުމުގެ ޙައްޤެއް ކައުންސިލަށް ނެތެވެ.